Azərbaycan, Bakı, 1 dekabr /Trend, müxbir E.Tariverdiyeva/
MDB ölkələrinin hökumət rəhbərləri 2011-ci ilin mayında azad ticarət zonası haqqında vahid sazişin imzalanmasını planlaşdırırlar. Bu barədə çərşənbə günü Bakıda BMT-nin Mərkəzi Asiya ölkələrinin iqtisadiyyatı üzrə Xüsusi Proqramının (SPECA)üzv ölkələrinin ikigünlük konfransının işində iştirak edən MDB İcraiyyə komitəsinin iqtisadiyyat departamentinin direktoru Andrey Kuşnirenko deyib.
"Bu sazişin imzalanması təkcə neft və qaz sahəsində deyil, həm də müasir texnologiyalar sahəsində mübadilə məqsədi ilə innovasiya layihələrinin həyata keçirilməsinə xidmət edəcək. Bundan başqa, bu sahələrdə birgə hazırlıq və kadrların mübadiləsi nəzərdə tutulur", - Kuşnirenko vurğulayıb.
Onun sözlərinə görə, hazırda MDB ölkələri arasında 1994-cü ildə imzalanan, 1999-cu ildə dəyişikliklər edilən azad ticarət rejimi haqqında saziş, eləcə də 100-ə yaxın ikitərəfli saziş qüvvədədir.
"Bu sənədlərin çoxu bir-birinə, eləcə də Ümumdünya Ticarət Təşkilatının normalarına ziddir. Vahid sazişin imzalanmasının məqsədi azad ticarət rejiminin təkmilləşdirilməsi üçün idxal və ixrac rüsumlarının maksimal dərəcədə, paraktiki olaraq sıfıra endirilməsi olacaq", - Kuşnirenko qeyd edib.
Departament direktorunun sözlərinə görə, hazırda ölkələrin çoxu, o cümlədən Azərbaycan sənədin hazırlanmasında fəal iştirak edir.
"Sənəd MDB-nin İcraiyyə komitəsində tamamlanmaqdadır və onun müddəalarının həyata keçirilməsinə gələn ilin mayında hökumət rəhbərlərinin sənədi imzalamasından sonra start veriləcək", - Kuşnirenko bildirib.