Azərbaycan, Bakı, 6 dekabr /Trend, müxbir İ.Xəlilova/
Asiya İnkişaf Bankı (AİB) gələcəkdə Azərbaycandakı strategiyası əsasında öz biznes fəaliyyətini qurmaq fikrindədir. Bu barədə bazar ertəsi bankın Bakıdakı nümayəndəliyinin məlumatında bildirilir.
AİB ilk dəfə olaraq Azərbaycandakı fəaliyyətinin strategiyasını işləyib hazırlamaq niyyətindədir.
"Strategiyanın hazırlanmasına gələn ildən başlanacaq. O, üç il üçün nəzərdə tutulub, buna qədər ikiillik dövrü əhatə edəcək biznes-plаn tərtib olunacaq", - nümayəndəlikdən bildiriblər.
Ölkədə bankın fəaliyyətinin prioritetlərinin dəyişdirilməsi planlaşdırılmır. AİB ölkənin dövlət, eləcə də özəl sektorunda energetika, nəqliyyat, şəhər təsərrüfatı kimi sahələrdə layihələr həyata keçirir. Bank Azərbaycanın nəqliyyat və energetika sektorlarında layihələrin kreditləşdirilməsində maraqlıdır.
Nümayəndəlikdən qeyd edildiyi kimi, bank gələn il ilk dəfə olaraq AİB-in Azərbaycandakı cari portfelinin icmalını aparmağı planlaşdırır.
Azərbaycan 1999-cu ildən AİB-in üzvüdür. 2010-cu il üzrə bank üçün üstün kreditləşmə sahələri kimi nəqliyyat, energetika və su təchizatı sektoru müəyyən edilib. 2010-cu ilin əvvəlinə bankın ölkə üzrə kredit portfeli 14 layihə üzrə 660,4 milyon dollar təşkil edib. Əməkdaşlıq dövrü ərzində AİB Azərbaycan hökumətinə və yerli şirkətlərə 13,122 milyon dollar məbləğində qrantlar ayırıb.
AİB 1966-cı ildə təsis olunub və 67 üzvü var. Bankın mənzil-qərargahı Filippinin paytaxtı Manilada yerləşir. Azərbaycan 1999-cu il dekabrın 22-də Asiya bankının üzvlüyünə qəbul edilib, bank kapitalında ölkənin iştirak payı 0,5 faiz təşkil edir.
AİB-in əsas səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və digərləridir.
