Azərbaycanda hələ ki avtomobil idxalına gömrük rüsumunun artırılmasına ehtiyac yoxdur

Azərbaycan, Bakı, 10 dekabr /Trend, müxbir N.İsmayılova/

Dövlət Gömrük Komitəsi avtonəqliyyat vasitələrinin daxili istehsalının müdafiəsi məqsədilə avtomobil idxalına gömrük rüsumunun artırılmasına lüzum görmür. Bu barədə cümə günü DGK-nın sədri Aydın Əliyev deyib.

"Bir neçə il bundan əvvəl ölkəyə ildə 90 mindən çox maşın ixdal edilirdisə, 2010-cu ilin doqquz ayı ərzində 42 min avtomobil gətirilib. İdxalın həcmi praktiki olaraq ötən ilki səviyyədə saxlanılıb", - Əliyev bildirib.

"Avtomobil idxalı 2009-cu ilin yanvar-oktyabr göstəricisi ilə müqayisədə 1,1 faiz artıb, buna görə də daxili bazarın müdafiəsi məsələsini qaldırmaq hələ tezdir", - Dövlət Gömrük Komitəsinin rəhbəri belə hesab edir.

Bundan əvvəl məlumat verildiyi kimi, Azərbaycanda avtonəqliyyat vasitələrinə Avro-2 ekoloji standartlarının tətbiq edilməsinə başlanılması (2010-cu il, 1 iyul) ilə əlaqədar olaraq MDB ölkələrindən avtomobil idxalı 2010-cu il ərzində iki dəfə ixtisara salınıb.

Yeni standartlar avtonəqliyyat vasitələrinə Avro-2 tətbiqinin iki istiqamətini nəzərdə tutur:

- Azərbaycana idxal olunan yeni avtomobillərlə bağlı. Avtomobil modeli ölkəyə birinci dəfə gətirilibsə, tullantı standartlarına müvafiq tipin müəyyən edilməsi üzrə prosedur keçirilməsi vacibdir. Eyni markalı avtomobilin növbəti dəfə gətirilməsi zamanı araşdırmalar aparılması tələb olunmayacaq;

- Artıq istismara verilmiş avtomobillərin Avro-2 standartlarına müvafiq tədqiqatı.

1996-cı ildən sonra buraxılmış, Azərbaycana gətirilən avtomobillər (Avro-2-in yaranması ilə) texniki pasportda göstərilmiş tullantılar üzrə məlumata uyğun olaraq yoxlanılacaq. 1996-cı ilə qədər buraxılmış avtomobillərin gətirilməsi mühərrikdə texniki işlərin həyata keçirilməsindən sonra mümkündür.

Bu şərtlər nadir maşınlara aid deyil. Həmçinin standartlar istismarda olan avtomobillərə tətbiq olunmayacaq.

İyulun birindən sonra Azərbaycana gətirilən avtomobillər illik mütləq baxışla yanaşı hər il əlavə texniki baxışdan keçəcək. İyulun birinə qədər ölkəyə gətirilən avtomobillər illik ənənəvi texniki baxışdan keçəcək.

Hazırda ölkədə neft məhsulları, xüsusilə də benzin və dizel yanacağının yeganə istehsalçısı ARDNŞ-dir (Azərbaycan Respublikası Dövlət Neft Şirkəti). Bundan əvvəl şirkətin rəhbəri Rövnəq Abdullayev bildirib ki, ölkədə istehsal olunan benzin və dizel yanacağı bütünlüklə Avro-2 standartlarına uyğun gəlir.

Yaxın güblərdə ARDNŞ NEZ-lərin modernləşdirilməsi hesabına istehsal olunan yanacağın keyfiyyətini Avro-3 standartlarına uyğunlaşdırmağı planlaşdırır.

Avro-5 və daha yüksək standartlara müvafiq neft məhsullarının istehsalı məqsədilə ARDNŞ tərkibinə neft emalı, qaz emalı və neftkimya istehalının daxil olduğu yeni kompleks tikmək niyyətindədir.