Azərbaycan, Bakı, 10 dekabr /Trend, müxbir E.İsmayılov/
Avropa Komissiyası və TRACECA (Avropa-Qafqaz-Asiya) nəqliyyat dəhlizinin Daimi Katibliyinin hökumətlərarası komissiyası TRACECA və Trans-Avropa nəqliyyat şəbəkəsinin (TEN-T) inteqsiyasının vacibliyini müzkirə ediblər. Bu barədə Avropa Qonşuluq Proqramının saytında yerləşdirilmiş məlumatda deyilir.
Müzakirələrin gedişində Avropa Komissiyası ilə gələcəkdə ТРАСЕCА strukturlarında islahatların aparılması və daha sıx əlaqələndirilməsi vasitəsilə əməkdaşlığın zəruriliyi qeyd olunub. TRACECA Daimi Katibliyinin baş katibi Eduard Biryukov gələcəkdə siyasi dialoqa yardımın vacibliyini də qeyd edib.
Görüşdə gələn il üzrə layihə və tapşırıqların cari vəziyyətinə də baxılıb. İştirakçılar maraqlı tərəflərin illik əlaqələndirmə iclaslarının keçirilməsi məsələsinə dair razılığa gəliblər.
TRACECA Aİ və onun Şərqi Avropa, Cənubi Qafqaz və Mərkəzi Asiyadakı tərəfdaş ölkələri arasında nəqliyyat sahəsində beynəlxalq əməkdaşlıq proqramıdır. Təşkilatın Bakıda da Daimi Katibliyi var.
Hazırda TRACECA-ya üzv olan iştirakçı dövlətlər bunlardır: Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna, İran.
