Azərbaycan, Bakı, 11 dekabr /Trend, müxbir N.İsmayılova/
Azərbaycan Dövlət Gömrük Komitəsi (DGK) və Azərbaycan Milli Elmlər Akademiyası Vilnüs Universiteti ilə birgə gömrük sahəsində hüquq pozuntularının aşkar edilməsi məqsədilə ultrasəsli qurğulardan istifadə üzrə layihə hazırlayırlar. Bu barədə şənbə günü "Gömrük" qəzetində dərc edilən məlumatda deyilir.
Layihə Vilnüs Universitetinin Fizika fakültəsi ilə birgə həyata keçiriləcək. Bu layihənin həyata keçirilmə məsələsi DGK-nın nümayəndə heyətinin noyabrın 29-dan dekabrın 1-dək Litvaya ölkənin Maliyyə Nazirliyi yanında Gömrük İdarəsinin fəaliyyəti ilə tanış olmaq və təcrübə mübadiləsi aparmaq məqsədilə səfəri çərçivəsində müzakiə edilib.
Universitetin nümayəndələrinə yeni layihə üzrə laborator-tədqiqat işləri təqdim edilib.
Universitet rəhbərliyi bu layihədə iştirak etmək niyyətini bildirib. Layihə başa çatdıqdan sonra iki ölkənin hazırladığı məhsul dünya bazarında təqdim oluna bilər.
