Azərbaycan, Bakı, 22 dekabr /Trend, müxbir Ü.İsmayılova /
Azərbaycan Sığortaçılar Assosiasiyası (ASA) təşkilatdakı sığorta şirkətlərinin üzvlük haqlarının məbləğinin azaldılması məsələsinə baxmır. Bu barədə çərşənbə axşamı ASA rəhbəri Azər Əliyev məlumat verib.
"Sığortaçıların 5 min manat təşkil edən üzvlük haqlarının məbləği ilə bağlı narazılıqları şübhəsiz ki, mövcuddur, bu da assosiasiyanın keçmiş fəaliyyəti ilə bağlıdır", - Əliyev bildirib.
Onun sözlərinə görə, assosiasiyanın kifayət qədər aktiv olmayan fəaliyyəti həm xarici şəraitlə, həm də daxili problemlərlə bağlı idi. O, bildirib ki, lakin hazırda ASA mövcud problemlərin aradan qaldırılması üzrə fəal iş aparır.
Əliyev deyib ki, ASA-nın illik üzvlük haqqının hazırkı məbləği (2009-cu ildə sığorta bazarı həcminin azalması ilə əlaqədar üzvlük haqqı dörd min manatadək azaldılmışdı, 2010-cu ildə isə yenidən artırıldı) o qədər də çox deyil, çünki bütün bu vəsaitlər assosiasiyanın saxlanmasına və ölkədə sığortanın təbliqi üçün aktiv fəaliyyətin aparılmasına yönəldilir.
ASA rəhbərinin sözlərinə görə, bəzi sığortaçılar üzvlük haqqının vahid səviyyəsindən narazıdırlar, çünki şirkətlərin yığımlarının həcmi fərqli olur.
"Bu faktı nəzərə alaraq, assosiasiya gələcəkdə bu problemin aradan qaldırılması üçün bu sahədə beynəlxalq təcrübəni öyrənəcək və tədbirlər görəcək", - Əliyev bildirib.
Azərbaycanda 27 sığorta və bir təkrar sığorta şirkəti fəaliyyət göstrərir. Bütün şirkətlər ASA-nın üzvləridir. Assosiasiyaya üzvlük haqqı 5 min manat təşkil edir. ASA 2006-cı ilin dekabrında yaradılıb.