Azərbaycan, Bakı, 8 yanvar/Trend, müxbir İ.Xəlilova/
Asiya İnkişaf Bankı (AİB) Azərbaycan hökuməti ilə ölkənin dəmir yol infrastukturunun təkmilləşdirilməsi üzrə tədbirlərin maliyyələşdirilməsi ilə bağlı danışıqları bərpa etməkdə maraqlıdır. Bu barədə şənbə günü AİB-in Bakı nümayəndəliyindən bildiriblər.
"Belə maraq hökumətin "Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı"nın həyata keçirilməsinə əlavə maliyyələşmənin cəlb edilməsi üzrə planları ilə əlaqədardır", - nümayəndəlikdən deyiblər.
Əvvəllər dövlət proqramının investisiya tələbatı 1 milyard manat təşkil edirdisə, indi o 2,4 milyard manat qiymətləndirilir.
Bu proqramın tərkib hissələrinin həyata keçirilməsi üçün xarici mənbələrdən artıq Dünya Bankından (kredit 450 milyon dollar təşkil edir) və Çexiya bankı EximBank-dan (215 milyon avro) cəlb edilib.
AİB-in Azərbaycanın dəmir yolunun inkişafına təklif etdiyi maliyyələşmənin nəzərdə tutulan məbləği 200 milyon dollar həcmində müəyyən edilib. Bu vəsaitləri şəxsi vəsaitlər hesabına ayrılması planlaşdırılmışdı.
Azərbaycan Prezidenti İlham Əliyevin sərəncamı ilə təsdiq olunan 2010-2014-cü illərdə Azərbaycanın dəmiryol nəqliyyatı sisteminin inkişafı üzrə Dövlət Proqramının əsas məqsədləri islahatların davam etdirilməsi və dəmir yollarının kommersiya fəaliyyəti üçün geniş imkanlar yaratmaq üzrə normativ-hüquqi bazanın təkmilləşdirilməsi, dəmiryol infrastrukturunun və dəmiryol parkının müasir tələblərə uyğun yenilənməsi üzrə tədbirlərin reallaşdırılması, Bakı-Tbilisi-Qars dəmir yolunun işə salınmasından sonra həcmi artacaq yüklərin nəqlinin təmin olunmasıdır.
Eləcə də proqramın məqsədinə yük və sərnişin daşımalarının keyfiyyətinin artırılması və təhlükəsizliyinin təmin olunması, nəqliyyat infrastrukturunda elmi-texniki nailiyyətlərin və qabaqcıl texnologiyaların tətbiqi, sərnişin daşımalarının keyfiyyətinin artırılması strategiyasının müəyyən edilməsi və reallaşdırılması, onların gəlirliliyinin artırılması, sabit cərəyanda işləyən yolların şimal hissəsinin bərpası, qərb istiqamətində sabit cərəyan sistemlərinin dəyişən cərəyana dəyişdirilməsi və müvafiq lokomotivlərin alınması, dizel lokomotivlərinin alınması, Bakı və Biləcəri dəmiryol xəstəxanaları istisna olmaqla, əlavə xidmətlərin ayrılması, kadrların hazırlanması və onların sosial təminarı da daxildir.
Proqramın "Azərbaycan Dəmir Yolları" QSC-nin öz vəsaitləri, daxili və xarici investisiyalar, texniki yardımlar və qrantlar, qanunvericiliyə zidd olmayan digər mənbələrin vəsaitləri hesabına maliyyələşdiriləcəyi ehtimal olunur.