Azərbaycan, Bakı, 11 yanvar /Trend, müxbir Ü.İsmayılova/
Azərbaycan Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi peşə xəstəlikləri nəticəsində əmək qabiliyyətinin itirilməsi və istehsalatda bədbəxt hadisələrdən icbari sığortanın tətbiqi üzrə fəal təbliğat aparır. Bu barədə çərşənbə axşamı müfəttişliyin rəhbəri Rauf Tağıyev deyib.
"Müfəttişlik daim peşə ittifaqları ilə görüşlər keçirir və işçilərin sığortalanmasının vacibliyini təbliğ edir", - Tağıyev bildirib.
Onun sözlərinə görə, icbari sığortanın təbliğatı cari yoxlama monitorinqləri zamanı da aparılır.
"Bu sığorta növünün mütləqliyinə baxmayaraq, mən belə hesab edirəm ki, işəgötürənlərdən tezliklə sığorta ilə təminatı tələb etmək hələ tezdir", - Tağıyev bildirib.
Bu günə ölkədə həyat sığortası üzrə iki şirlət fəaliyyət göstərir - "Atəşgah Həyat" və "Qala Həyat". Bu iki şirkət ölkədə fəaliyyət göstərən bütün hüquqi və fiziki şəxsləri əhatə edə bilməz.
Tağıyevin sözlərinə görə, öz işçilərini sığortalamayan işəgötürənlər üçün cərimə sanksiyasının həcmi riskin səviyyəsindən asılı olaraq maksimum 3 min manat dəyərində müəyyən edilib.
2010-cu ilin iyulunda Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunu təsdiq edib.
Azərbaycanda 2007-ci ildə 259 bədbəxt hadisə, 128 ölüm, 202 müxtəlif dərəcəli xəsarət faktı qeydə alınıb; 2008-ci ildə 255 bədbəxt hadisə, 79 ölüm və 212 xəsarət alma faktı, 2009-cu ildə 250 bədbəxt hadisə, 69 ölüm hadisəsi və 218 xəsarət alma faktı qeydə alınıb.