Azərbaycan, Bakı, 19 yanvar /Trend, müxbir N.İsmaylova/
2010-cu ildə Böyük Britaniya Azərbaycana yatırılan investisiyaların həcminə görə liderliyini qoruyub. Onun xarici investisiyaların həcmində xüsusi çəkisi 51,9 faiz təşkil edib. Bu barədə Dövlət Statistika Komitəsindən bildiriblər. Böyük Britaniyanın investisyaları 1247,2 milyon manat təşkil edib.
Ötən il Azərbaycan iqtisadiyyatına xarici ölkə və beynəlxalq təşkilatlar tərəfindən yatırılan investisiyaların 94,8 faizi (2279,7 milyon manat) Böyük Britaniya, ABŞ, Çexiya, Yaponiya, Norveç, Koreya, Fransa və Türkiyə investorlarının payına düşür.
ABŞ investisyaları 359,38 milyon manat (xüsusi çəkidə 14,9 faiz), Yaponiya 180,11 milyon manat (7,5 faiz), Norveç 111,87 milyon manat (4,7 faiz), Fransa 29,39 milyon manat (1,2 faiz), Türkiyə 94,8 milyon manat (3,9 faiz), Koreya 40,23 milyon manat (1,7 faiz), Çexiya 216,7 milyon manat (9 faiz), BƏƏ 390,6 min manat, Səudiyyə Ərəbistanı 4,27 milyon manat (0,2 faiz), Rusiya 1,937 milyon manat (0,1 faiz), Almaniya 700 min manat, Avstriya 551,8 min manat (0,1 faiz), İtaliya 321,5 min manat, İsveçrə 2,18 milyon manat, Lüksemburq 11,1 min manat təşkil edib.
Beynəlxalq maliyyə institutlarından ən böyük investisya həcmi Dünya Bankı tərəfindən (3,3 faiz xüsusi çəki ilə 79,9 milyon manat) yatırılıb. Asiya İnkişaf Bankı Azərbaycanda layihələrin həyata keçirilməsinə 32,22 milyon manat (1,3 faiz), İslam İnkişaf Bankı isə 3,68 milyon manat (0,2 faiz) yönəldib.
