Azərbaycan, Bakı, 21 yanvar /Trend, müxbir Ü.İsmayılova/
Azərbaycanda daşınmaz əmlakın icbari sığortasını tətbiq etmək lazımdır. Bu barədə cümə günü Azərbaycan Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin Baş Dövlət Tikinti Müfəttişliyinin rəisi Xalid Nəcəfov Xəzər-Avropa İnteqrasiya İşgüzar Klubunun (CEIBC) iclasında deyib.
"Daşınmaz əmlak obyektlərinin sığortasının olması sökülmə və ya obyektlərin qeydiyyatı ilə bağlı digər problemlər zamanı sakinlərə təzminatların ödənilməsi ilə əlaqədar problemləri həll edə bilər", - Nəcəfov bildirib.
Onun sözlərinə görə, daşınmaz əmlak obyektlərinin sığortalanması məsələsi həm Tikinti Məcəlləsinin layihəsində, həm də "Sığortanın icbari növləri haqqında" qanun layihəsində nəzərdə tutulub. Bu layihənin hər ikisi artıq baxılmaq üçün Milli Məclisə təqdim edilib.
Hazırda Bakıda FHN-in qəbul komissiyasından keçməyən 50-dən çox bina istismar edilir. Bu, qanunun tələblərinə ziddir.
"Müfəttişlik mövcud problemləri aradan qaldırmaq üçün bu binalara qarşı nəzarəti və tələbləri gücləndirəcək", - Nəcəfov qeyd edib.
"Tikinti şirkətlərinin obyektləri müvafiq yoxlanışdan keçməsə və müfəttişliyin rəyini almasa, onlar söküləcək. Bu, müfəttişliyin qəbul edə biləcəyi son qərardır", - o, bildirib.
