Azərbaycan, Bakı, 21 yanvar /Trend, müxbir N.İsmayılova/
2011-ci ildə Azərbaycanın bank olmayan kredit təşkilatı "TBC Kredit" kreditləşmə həcmlərini artırmağı və porfelin 30 milyon dollaradək artımını təmin etməyi planlaşdırır. Bu barədə cümə günü şirkətdən məlumat verilib.
"Ötən il olduğu kimi, 2011-ci ildə də prioritetlər biznes-kreditləşmədə, eləcə də əhaliyə ipoteka kreditlərinin aktiv verilməsində qalır. Bu məqsədlə yanvarın 1-dən ipoteka kreditləri üzrə faiz dərəcələri 4 faiz azaldılıb və bu gün illik 14 faiz təşkil edir", - şirkətdən bildiriblər.
Yanvarın 1-nə olan məlumata görə, şirkətin kredit portffelinin həcmi 19,3 milyon dollar, aktiv kreditlərinin sayı 1973 təşkil edir. Kreditlərin ümumi həcmində biznes-kreditlərin payı 43 faiz, mikrobiznes-kreditlər 11 faiz, ipoteka kreditləri 28 faiz, istehlak kreditləri isə 18 faiz təşkil edir.
"TBC Kredit" bank olmayan kredit təşkilatı Azərbaycanda 1999-cu ildən fəaliyyət göstərir. 2007-ci ilin dekabrından təşkilatda iştirak payının 75 faizi Gürcüstanın aparıcı "TBC Bank"ına və 25 faiz ABŞ-ın "ShoreBank International Ltd" şirkətinə məxsusdur. Kredit təşkilatının nizamnamə kapitalı 10 milyon dollar təşkil edir.
