Azərbaycan, Bakı, 22 yanvar / Trend, müxbir Ü. İsmayılova /
Azərbaycanda yalnız həyat sığortası ilə məşğul olan iki şirkətin - Atəsgah Həyat və Qala Həyat şirkətlərinin mövcud olması istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsindən icbari sığorta üzrə bazarın tam potensialını əhatə edə bilməz. Bu barədə Alfa Sigorta şirkətinin Direktorlar Şurasının sədri Xəyal Məmmədxanlı şənbə günü bildirib.
"Düşünürəm ki, belə həcmdə sığorta bazarını əhatə etmək üçün həyat sığortası sahəsində xidmətləri əhatə edən ən azı 10 şirkət fəaliyyət göstərməlidir ", - Məmmədxanlı bildirib.
Onun sözlərinə görə, bazarda belə şirkətlərin sayının çox olması keyfiyyətli sığorta xidmətləri göstərmək üçün azad rəqabətə şərait yaratmağa, ən başlıcası isə bütün işçilərin və işəgötürənləri əhatə etməyə imkan verəcək.
"İstehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsindən icbari sığorta üzrə yığımların potensial həcmi ildə 50-100 milyon manat təşkil edir", - Məmmədxanlı hesab edir.
Məmmədxanlı hesab edir ki, 2012-ci ildə bu bazarın potensialı 70-80 faizi əhatə edə bilər. Belə gözləntilər ölkədə life-şirkətlərin sayının artırılması planları ilə əlaqədardır.
2010-cu ilin iyulunda Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsindən icbari sığorta haqda" qanunu təsdiqləyib.Sığortanın bu növünün tətbiqinə 2011-ci ildən başlanılıb və yanvarın birinci yarısında 500-dən artıq müqavilə imzalanıb.
Ümumdünya Əmək Təşkilatının məlumatına görə, hər il dünyada istehsalatda baş verən bədbəxt hadisələr nəticəsində 2,3 milyon insan həlak olur, bu rəqəmdən üç dəfə çox şəxs isə müxtəlif növ zədələr alır.
2007-ci ildə Azərbaycanda 259 bədbəxt hadisəyə, 128 ölüm faktına, 202 müxtəlif növ zədəalma halına təsadüf edilib. 2008-ci ildə 255 bədbəxt hadisə, 79 ölüm faktı və 212 zədəalma faktı, 2009-cu ildə 250 bədbəxt hadisə, 69 ölüm hadisəsi və 218 zədəalma faktı qeydə alınıb.2010-cu ildə Azərbaycanda istehsalatda 31-i inşaat sektorunda olmaqla 69 hadisəsi qeydə alınıb.
Yanvarın 22-nə olan rəsmi məzənnə 0,7974 AZN/USD təşkil edir.