Azərbaycan, Bakı, 28 yanvar /Trend, müxbir Ü.İsmayılova/
2010-cu ildə Bakıda ilkin daşınmaz əmlak bazarında mənzillərin bir kvadratmetrinin qiyməti 0,7 faiz, ötən ilin dekabr ayına nisbətdə isə 1,6 faiz ucuzlaşıb. Bu barədə cümə axşamı "Əmlak Bazarı İştirakçıları" İctimai Birliyindən məlumat verilib.
"Ötən ilin dördüncü rübündə qiymətlər 2009-cu illə müqayisədə 1,9 faiz azalıb", - təşkilatdan bildiriblər.
Müştəri bazasında yaranan qıtlıq nəticəsində tikinti şirkətlərinin 80 faizi öz tikililərini kreditlə təqdim etməyə başlayıblar.
2010-cu ildə Bakıda 26 binanın özülünün qoyulmasına başlanılıb. Bazara beş tikinti şirkəti daxil olub ki, nəticədə onların ümumi sayı 155-ə çatıb. Bu da 2009-cu ildəkindən 19 şirkət, yaxud 36,8 faiz çoxdur.
Tikinti şirkətlərinin sayının artması həm özəl sahibkarlar, həm də xarici sərmayədarlar tərəfindən daşınmaz əmlak bazarına marağın dirçəlməsindən xəbər verir.
Bazarın araşdırılması göstərir ki, hazırda yaşayış komplekslərinin tikintisi artır. Ölkə hökumətinin inzibati müdaxiləsi nəticəsində, eləcə də bazarda tələbin artması ilə bağlı yeni tikililərdə mərtəbələrin sayı 12-dək, 7-dək və daha çox azalıb.
Təşkilatın mütəxəssislərinin araşdırmasına görə, Bakıda ilkin bazarda fəallıq hələ orta səviyyədən aşağıdır və bunun əsas səbəbləri aşağıdakılardır:
- real tələb üzərində təklifin artması nəticəsində alıcı qıtlığının yaranması,
- şəhərin mərkəzində qiymətlərin yüksək olması səbəbindən şəhərdən kənarda mənzil alınmasına üstünlük verilməsi,
- yenitikililərin ipoteka kreditlərinin alınması şərtlərilə (zəruri sənədlərin olmaması üzündən) uyğun gəlməməsi,
-kommunal problemlər və sənədləşdirmə ilə bağlı problemlərə görə yenitikililərə etimadın azalması.
Yaranmış vəziyyətlə bağlı 2010-cu ildə yalnız Bakıdakı doqquz yenitikilidə bütün mənzillər satılıb. Hazırda Bakıda tikilən binaların 80 faizində sonuncu mərtəbələrdə mənzillərin satışı ilə bağlı problemlər mövcuddur ki, bu da onların bazara çıxmasına mane olur.
Qurumda hesab edirlər ki, bəzi şirkətlərin investisiya davamlılığını və geniş maliyyə imkanlarını nəzərə alaraq, 2011-ci ildə bazarın dinamik inkişaf edəcəyini proqnozlaşdırmaq mümkündür. Bununla yanaşı, məlumatda bildirilir ki, xarici sərmayədarların Azərbaycandakı ilkin mənzil bazarına marağının artdığını da qeyd etmək lazımdır.
