Azərbaycan, Bakı, 2 fevral /Trend, müxbir N.İsmayılova/
Azərbaycan Mərkəzi Bankı (AMB) ABŞ-ın "Citibank"ı ilə Azərbaycandakı nümayəndələyinin törəmə banka çevrilməsi ilə bağlı danışıqlar aparır. Bu barədə çərşənbə günü Trend-ə AMB-nin idarə heyətinin sədr müavini Vadim Xubanov deyib.
"Citibank" vəziyyəti müşahidə edir, buna görə bu bankdan AMB-yə rəsmi təklif indiyə qədər daxil olmayıb", - Xubanov bildirib.
ABŞ-ın "Citibank" nümayəndəliyi 2008-ci ilin mayında Türkiyənin eyniadlı səhmdar cəmiyyəti vasitəsilə açılıb. Bank ölkədə geniş planlarını, bank əməliyyatlarını nümayəndəliyi filiala çevirməklə həyata keçirməyə hazır olduğunu elan edib. Lakin dünya maliyyə böhranı səbəbindən qlobal oyunçulardan hesab edilən bank öz planlarını təxirə salıb.
Respublikada iki bankın - Latviyanın "Parex Bank" və Almaniyanın "Commerz Bank"ının nümayəndəlikləri fəaliyyət göstərir. Alman bankına icazə 2007-ci ilin noyabrında verilib.
İdarə heyətinin sədrinin müavininin sözlərinə görə, hazırda Mərkəzi Banka xarici banklar tərəfindən ölkədə filialın açılması ilə bağlı müraciət daxil olmayıb.
Hazırda Azərbaycanda 44 bank fəaliyyət göstərir. Onların 22-də xarici kapital iştirak edir. Yeddi bankda xarici kapitalın iştirakı 50 faizlə 100 faiz arasında, 13 bankda isə 50 faizədək dəyişir. Ölkədə xarici bankların iki filialı da fəaliyyət göstərir.
