Azərbaycan, Bakı, 7 fevral /Trend, müxbir N.İsmayılova/
Dünya Bankı qrupunun üzvü olan Beynəlxalq Maliyyə Korporasiyası (BMK) Azərbaycanda korporativ idarəetmə statndartlarının tətbiqi layihəsi (ACGP) çərçivəsində pilot bank qismində seçilən Azərbaycan bankı "Rabitəbank"da korporativ idarəetmə təcrübəsinin qiymətləndirməsinə başlayıb. Bu barədə bazar ertəsi ACGP rəhbəri Karolina Brayt bildirib.
"Bankda korporativ idarəetmə statndartlarının yüksəldilməsi sahəsində tədbirlər payızda başa çatacaq", - Brayt deyib.
Texniki yardım çərçivəsində "Rabitəbank"a idarəetmə standartlarının beynəlxalq təcrübəyə uyğunlaşdırılması planı təqdim olunacaq.
BMK-nın ekspertləri səhmdarlarla, Müşahidə Şurası və menecmentlə məsləhətləşmələr aparacaq, eləcə də bankda fəaliyyətdə olan korporativ sənədlərin, prosedur və qaydaların icmalını aparacaqlar.
BMK korporativ idarəetmə layihəsi (ACGP) 2005-ci ildən fəaliyyət göstərir və yerli şirkətlər və banklara işlərin optimallaşdırılması və maliyyələşmə və sərmayələrin cəlb edilməsi üzrə imkanların artırılmasına yönəlib.
"Rabitəbank" uzun illərdir ki, BMK ilə əməkdaşlıq edir. "Rabitəbank" 1997-ci ildə BMK-dan kredit xətti almış ilk banklardan biridir. Son illər ərzində bankın BMK ilə əməkdaşlığı bir neçə kredit xətləri və məsləhət xidmətləri sahəsində genişlənib. 30 sentyabr 2010-cu il tarixində BMK və "Rabitəbank" bankın 12,5 faiz və bir səhm paketinin alınması barəsində müqavilə imzalayıblar.
"Rabitəbank" Azərbaycan bank bazarında 1993-cü ildən fəaliyyət göstərir. 30 sentyabr, 2010-cu il tarixinə bankın aktivləri 145 milyon ABŞ dolları, kapitalı 20 milyon ABŞ dolları olub. Bank fiziki və hüquqi şəxslərə 6-sı Bakı şəhərində yerləşməklə 14 regionda 20 filial şəbəkəsi ilə bütün növ maliyyə xidmətlərini təqdim edir.
BMK Dünya Bankı qrupunun üzvü olaraq, inkişaf etməkdə olan ölkələrdə özəl biznes mühitinin inkişaf etdirilməsi sahəsində fəaliyyət göstərən, dünyanın ən böyük beynəlxalq inkişaf institutlarından biridir. BMK biznes sahiblərinə maliyyə vəsaitləri və eyni zamanda onların davamlı inkişafını təmin etmək üçün məsləhət xidmətləri göstərməklə həmin şirkət və təşkilarlar tərəfindən daha çox insanların işlə təmin olunması və onların həyat səviyyəsinin artırılması üçün çalışır. Qlobal iqtisadi qeyri-müəyyənlik davam edən 2010-cu il ərzində BMK tərəfindən maliyyələşmə 18 milyard ABŞ dollarına qədər artırılıb.
BMK korporativ idarəetmə layihəsi (ACGP) 2005-ci ildən fəaliyyət göstərir. BMK-nın təşəbbüsü və İsveçrənin İqtisadi Əməkdaşlıq üzrə Dövlət Katibliyinin (SECO) maliyyələşdirilməsi əsasında həyata keçirilən layihənin rəsmi açılışı 2005-ci il yanvarın 26-da keçirilib. Layihənin birinci fazasının üç il müddətinə 2,1 milyon dollarlıq büdcə ilə reallaşdırılması nəzərdə tutulub.
Layihənin ikinci fazasının maliyyələşdirilməsinin SECO tamamilə öz üzərinə götürüb və onun həyata keçirilməsinə 4 milyon dollardan artıq vəsait ayırıb.
Korporativ idarəetmə layihəsi korporativ idarəetmə standartlarının İqtisadi Əməkdaşlıq və İnkişaf Təşkilatının (OECD) normalarına uyğun tətbiqinə kömək edəcək.
Fevralın 7-nə rəsmi məzənnə 0,7961 AZN/USD təşkil edir.