Azərbaycan, Bakı, 11 fevral /Trend, müxbir N.İsmayılova /
Azərbaycanda vergidən yayınma halları ödənişlərin nağd vəsaitlərlə həyata keçirildiyi sahələrdə müşahidə olunur. Bu barədə cümə günü jurnalistlərə vergilər naziri Fazil Məmmədov deyib.
"Nağdsız ödənişlərin aparıldığı sahələrdə vergi ödəməkdən yayınma faktları minimuma endirilib", - Məmmədov bildirib.
Nazirin sözlərinə görə, indi nağdsız ödənişlərin stimullaşdırılması üçün iş aparılır, Şərqi və Qərbi Avropanın müxtəlif ölkələrinin, Baltik dövlətləri və Braziliyanın təcrübəsi öyrənilir.
"Ümumilikdə, banklar tərəfindən ticarət obyektlərində POS-terminallar quraşdırılmalıdır, rabitə və sistemlə bağlı məsələlər həll edilməlidir, plastik kartlardan istifadə üzrə tariflərə baxılmalıdır. İndi nazirlik Mərkəzi Bankla birlikdə qanunvericilik aktlarına zəruri dəyişikliklərin hazırlanması üçün iş aparır", - o, bildirib.
