Azərbaycan, Bakı, 17 fevral /Trend, müxbir N.İsmayılova/
İsveçrənin İqtisadi Məsələlər üzrə Dövlət Katibliyi (SECO) Azərbaycan hökumətinə müfəttişliyin aparılması və icazə sisteminin təkmilləşdirilməsi sahəsində gələcəkdə də dəstək göstərməyə hazırdır. Trend-in məlumatına görə, bu barədə cümə axşamı İsveçrə əməkdaşlıq ofisinin Cənubi Qafqaz üzrə milli proqramının rəhbəri Nailə Səfərova deyib.
"Biz Beynəlxalq Maliyyə Korporasiyasının (BMK) Azərbaycanda biznes mühitinin inkişafı üzrə həyata keçirdiyi layihə vasitəsilə müfəttişlik və icazə sisteminin təkmilləşdirilməsinə dəstək veririk. Biz hökumətə bu istiqamətdə gələcəkdə də dəstək verməyə hazırıq", - Səfərova bildirib.
İnvestisiya mühitinin yaxşılaşdırılması üzrə layihənin həyata keçirilməsi 2008-ci ilin avqustunda BMK, SECO və BP-nin dəstəyi ilə başlayıb. Layihə beş il üçün nəzərdə tutulub. Onun həyata keçirilməsində əsas məqsəd sahibkarlar üçün biznes mühitinin yaxşılaşdırılmasıdır. Bu, davamlı və çoxtərəfli iqtisadi artımı təmin etməyə imkan verəcək.
SECO biznes mühitinin təkmilləşdirilməsi üçün hökumətə 4,3 milyon dollar məbləğində, BP şirkətinə isə 0,456 milyon dollar qrant təqdim edib.
BMK MDB ölkələrində biznes mühitinin təkmilləşdirilməsi layihələri vasitəsilə 11 əsas hüquq qaydalarına dəyişikliklər edilməsinə köməklik edib. Bu isə kiçik və orta sahibkarlığa 93 milyon dollar məbləğində qənaət etməyə imkan verib.