Azərbaycan, Bakı, 3 mart /Trend, müxbir N.İsmayılova/
2011-ci ilin yanvarında Azərbaycanda bank sektorunun kapitallaşması 0,5 faiz, il ərzində isə ötən ilin analoji dövrü ilə müqayisədə 9,9 faiz artaraq 2180,51 milyon manat təşkil edib. Bu barədə cümə axşamı Azərbaycan Mərkəzi Bankından (AMB) məlumat verilib.
AMB-nin açıqladığı statistik rəqəmlərə görə, cari ilin yanvar ayının yekunları üzrə kapitalı 10 milyon manatdan çox olan bankların sayı 41 ədəd olub və ötən ilin dekabrı, eləcə də yanvar ayı ilə müqayisədə bir bank artıb. Yanvarda bütün bankların kapitalının məcmu həcmində bu kateqoriyadan olan bankların xüsusi çəkisi 98,9 faiz olub, bir il əvvəl isə bu göstərici 98,7 faiz təşkil edib.
İki bankın (0,9 faizlik xüsusi çəki ilə) kapitalı beş milyon manatla on milyon manat, bir bankın (0,2 faizlik) kapitalı isə 3,5 milyon manatla beş milyon manat civarında formalaşıb.
Martın 3-nə olan rəsmi məzənnə 0,7940 AZN/USD təşkil edir.
