Azərbaycan, Bakı, 3 mart /Trend, müxbir Ü.İsmayılova/
Azərbaycanın Dövlət Şəhərsalma və Arxitektura Komitəsi böyük Bakının regional inkişaf planının hazırlanması çərçivəsində ilkin işləri müəyyənləşdirib. Bu barədə cümə axşamı dövlət komitəsinin sədr müavini Dövlətxan Dövlətxanov deyib.
"İlkin mərhələdə dövlət komitəsi üç müxtəlif istiqamətdə iş üçün üç beynəlxalq məsləhətçi cəlb etmək niyyətindədir", - Dövlətxanov bildirib.
Birinci istiqamət ərazinin iqtisadi inkişaf planının hazırlanmasını, ikincisi, ekoloji inkişaf planını, üçüncüsü isə ərazidən istifadənin innovasiya üsullarının tətbiqi planını nəzərdə tutur.
Onun sözlərinə görə, bu işlərə aprel-may aylarında başlamaq planlaşdırılıb.
"Bakıdövlətlayihə" layihələşdirmə institutu cəlb edilən məsləhətçilərə verilmək üçün yeni ərazilərin təhlili, onların inkişafı və digər müvafiq informasiyanın toplanması üzrə işlər aparır. Dövlətxanov onu da bildirib ki, hazırda Bakıda tikinti işləri "Bakıdövlətlayihə" tərəfindən hazırlanaraq, 1987-ci ildə qəbul edilən Bakının baş planı əsasında aparılır.
"Baxmayaraq ki, əvvəllər qəbul edilən baş plan 2005-ci ilədək olan müddəti əhatə edib, qüvvədə olan qanunvericiliyə əsasən, o, yeni plan təsdiq edilənədək və qüvvəyə minənədək öz qüvvəsini itirmir", - Dövlətxanov vurğulayıb.
Onun sözlərinə görə, baş planda göstərilən hələ də istifadə edilməmiş ərazilər var. Onlardan şəhərin gələcək inkişafı üçün istifadə etmək olar.
"Əvvəllər qəbul edilən baş plan praktiki olaraq qüvvədədir və hətta hazırda yeni işlər layihələşdirilən zaman onu əsas kimi götürmək olar", - Dövlətxanov qeyd edib.
Plan böyük Bakının inkişafını nəzərdə tutur, belə ki, Bakının köhnə planı paytaxtın 22 min hektar ərazisini əhatə edib. Hazırda Bakının real ərazisi 219 min hektardan çoxdur.
Bu layihə Bakı və Sumqayıtın, eləcə də Abşeron rayonunun yaxın 20 ilə perspektiv inkişafını əks etdirir. Belə layihələr Şərqi Avropanın bir sıra ölkələrində həyata keçirilib. Lakin onların heç biri paytaxtı şəhərətrafı regionla və 3 milyondan çox əhali ilə əhatə etməyib. Şübhəsiz ki, layihə Azərbaycanın şəhər planlaşdırılmasında yeni mərhələ olacaq. Layihədə yeni texnologiyalar, məsələn, coğrafi-informasiya sistemi və s. tətbiq olunacaq.
Hazırda Azərbaycanda 77 şəhər, 360 qəsəbə və 4 minə yaxın kənd var.