Azərbaycan, Bakı, 9 mart /Trend, müxbir Ü.İsmayılova/
Azərbaycanda Böyük Bakının regional inkişaf planının hazırlanması üçün beynəlxalq məsləhətçinin seçilməsi üzrə təkrar tender elan edilib. Bu barədə Dövlət Şəhərsalma və Arxitektura Komitəsinin sədr müavini Dövlətxan Dövlətxanov deyib. Layihə Dünya Bankının dəstəyi ilə hazırlanacaq.
"Planın hazırlanmasına başlanılmasının ləngiməsinin əsas səbəbi maliyyə məsələləri ilə bağlı çətinliklər, eləcə də beynəlxalq məsələhətçinin seçilməsi üçün tenderin keçirilməsi prosedurunun mürəkkəbliyidir", - Dövlətxanov bildirib.
Onun sözlərinə görə, nisbətən ucuz qiymət keyfiyyət göstəricisi deyil.
"Biz istəyirik ki, paytaxtımıza artıq Bakıya bənzər şəhərlərin baş planının yaradılması üzrə uğurlu iş təcrübəsinə malik dünya səviyyəli aparıcı məsləhətçilər gəlsin", - Dövlətxanov qeyd edib.
Dünya Bankı hələ ötən ilin yayında elan edilən tenderi ləğv edərək, bir məsləhətçinin seçilməsi ilə bağlı təkliflə çıxış edib, bu isə belə həcmdə işlər görülən zaman peşəkarlıq baxımından düzgün deyil, dövlət komitəsində hesab edirlər.
Bank bunu Böyük Bakının regional inkişaf planının hazırlanmasına maliyyələşdirmə xərclərinin azaldılması ilə izah edib, belə ki, ötən müddət ərzində işlərin bir hissəsi artıq yerli mütəxəssislər tərəfindən görülüb.
Plan Böyük Bakı adını alıb, belə ki, köhnə plan paytaxt ərazisinin 22 min hektarının qrafik prinsiplərini və konsepsiyasını əhatə edib, halbuki Bakının real ərazisi 219 min hektardan çoxdur.
Bakı şəhərinin sonuncu baş planı 1987-ci ildə qəbul edilib. Artıq bir ildir ki, Azərbaycan hökuməti tərəfindən DB-nin krediti hesabına Böyük Bakının regional inkişaf planının hazırlanması üzrə layihə həyata keçirilir. Bu layihə Bakı və Sumqayıtın, eləcə də Abşeron rayonunun yaxın 20 ilə perspektiv inkişafını əks etdirir. Belə layihələr Şərqi Avropanın bir sıra ölkələrində həyata keçirilib. Lakin onların heç biri paytaxtı şəhərətrafı regionla və 3 milyondan çox əhali ilə əhatə etməyib. Şübhəsiz, layihə Azərbaycanın şəhər planlaşdırmasında yeni mərhələ olacaq. Layihədə yeni texnologiyalar, məsələn coğrafi-informasiya sistemi tətbiq olunacaq.