Azərbaycan, Bakı, 30 mart /Trend, müxbir E.İsmayılov/
Fevralda Bakı Beynəlxalq Dəniz Ticarət Limanından yanvardakı 350 min tona qarşı 270 min ton bərə yükü daşınıb. Bu barədə çərşənbə günü Bakı limanındakı mənbə deyib.
Mənbənin sözlərinə görə, ümumilikdə, yanvar-fevralda liman vasitəsilə 620 min ton bərə yükü daşınıb.
Həmçinin, 2010-cu ildə liman tərəfindən 2,93 milyon ton bərə yükü daşınıb. Bu da 2009-cu ilin analoji dövr göstəricisindən 28 faiz çoxdur.
Mənbənin sözlərinə görə, həmçinin yanvarda liman vasitəsilə 765 ədəd konteyner daşınıb. Ötən ilin yanvarında bu göstərici 795 olub. Yanvar-fevralda liman vasitəsilə cəmi 1560 ədəd konteyner daşınıb.
2010-cu ildə liman vasitəsilə 9600 ədəd konteyner daşınıb ki, bu da 2009-cu ilin göstəricisindən üç dəfə çoxdur. Konteyner yüklərinin böyük hissəsini Avropadan Qazaxıstan (Aktau) istiqamətində göndərilən humanitar yüklər təşkil edir.
Mənbə bildirib ki, yanvar-fevralda limanda 1,1 milyon ton yük emal olunub.
2010-cu ildə liman vasitəsilə 5,76 milyon ton müxtəlif yüklər daşınıb ki, bu da 2009-cu ilin göstəricisindən 12 faiz çoxdur.
Mənbənin sözlərinə görə, ümumi və yüklərin ayrı-ayrı növləri üzrə daşımalarda əhəmiyyətli artım limandakı 12-ci körpünün təmirdən sonra istismara verilməsi, Avropa-Asiya istiqamətində yük daşımalarının artması, Türkmənistandan neft yüklərinin daşınmasındakı artımla bağlıdır.