Azərbaycan, Bakı, 1 aprel /Trend, müxbir İ.Xəlilova/
Azərbaycan Respublikası Dövlət Neft Fondunun (ARDNF) iştirak etdiyi Beynəlxalq Maliyyə Korporasiyası (BMK) yanında yaradılan Afrika, Latın Amerikası və Karib hövzəsi Fondu (ALAC) maliyyə, turizm, pərakəndə satış və daşınmaz əmlak, sənaye sahələrində həyata keçirilən layihələrə investisiya yatırıb. Bu barədə cümə günü ARDNF-dən bildiriblər.
ALAC Afrika, Latın Amerikası və Karib hövzəsi ölkələrində əlverişli biznes və investisiya mühitinin təşkili məqsədi ilə yaradılıb. Fondun vəsaitinin ümumi həcmi 1 milyard dollar təşkil edir.
"Hazırda fonda sərmayə yatırımı dayandırılıb. ARDNF ilə yanaşı, BMT-nin Pensiya Fondu, Niderlandın Təqaüd Fondu, Koreya İnvestisiya Korporasiyası, Səudiyyə Ərəbistanı Krallığının Maliyyə Nazirliyi və Əbu Dabi Suveren Fondu, BMK Aktivlərin İdarəedilməsi Şirkəti fonda müxtəlif həcmdə sərmayə yatırıblar", - ARDNF-dən deyiblər.
Coğrafi cəhətdən cari portfel Afrika, Latın Amerikası və Karib hövzəsi regionu arasında 60 faiz, 24 faiz və 15 faiz nisbətində bölünüb. Adıçəkilən fondun investisiya etdikləri ölkələr arasında ən böyük pay Meksika, Nigeriya, Tanzaniya və Trinidad və Tobaqoya aiddir. Fondun idarəçiliyində olan vəsaitlərdən 100 milyon dollara yaxını ARDNF-dən ayrılıb.
ARDNF 1999-cu ildə yaradılıb. 2011-ci il yanvarın 1-nə olan vəziyyətə görə, onun aktivləri ötən ilin əvvəli ilə müqayisədə 52,8 faiz (14 900,4 milyon dollar) artaraq 22 766,8 milyon dollar təşkil edib.
Dövlət Neft Fondunun əsas məqsədləri bunlardır: iqtisadiyyata mənfi təsirlərin minimallaşdırılması məqsədilə fondun vəsait və aktivlərini xaricdə yerləşdirməklə müəyyən dərəcədə "holland sindromu"nun qarşısını almaq, vəsaitlərin gələcək nəsillər üçün toplanmasını təmin etmək və ölkədə cari sosial-iqtisadi prosesləri dəstəkləmək.
ALAC Fonduna investisiyalar ARDNF-nin xaricdə ilk investisiyaları olub. ARDNF-nin 2011-ci il üçün investisiya proqramında ilk dəfə olaraq Xəzərdə neft-qaz layihələrinə investisiyalar nəzərdə tutulub. ARDNF uzunmüddətli investisiya reytinqinə malik emitentlərin qiymətli kağızlarına və Xəzərdə layihələrin həyata keçiirlməsinə 600 milyon dollardan çox investisiya yatıra bilər.
