Azərbaycan, Bakı, 2 aprel /Trend, müxbir A.Axundov/
Azərbaycan Dövlət Gömrük Komitəsi yanvar-fevralda dünyanın 102 ölkəsi ilə aparılan xarici ticarət əməliyyatlarının yekunlarını elan edib. Bu barədə şənbə günü Trend-ə komitədən bildiriblər.
Ölkənin ümumi mal dövriyyəsi 4,717 milyard dollar təşkil edib ki, bu da ötən ilin analoji dövr göstəricisindən 23,7 faiz çoxdur.
Xarici ticarət əməliyyatlarında 2,062 milyard dollar həcmində müsbət saldo yaranıb.
2011-ci ilin ilk iki ayı ərzində xarici ticarət əməliyyatlarında 2673 hüquqi və fiziki şəxs qeydə alınıb. Onlardan 1783-ü hüquqi, 890-ı isə fiziki şəxsdir.
Yanvar-fevralda ixrac əməliyyatları 2010-cu ilin analoji dövrü ilə müqayisədə 9,2 faiz artaraq 3,39 milyard dollar olub. İxracda dövlət sektorunun payı 3,23 milyard dollar, özəl sektorun payı 146,993 milyon dollar, fiziki şəxslərin payı isə 11,825 milyon dollar təşkil edib.
Yanvar-fevralda idxal 2010-cu ilin yanvar-fevralı ilə müqayisədə 87,15 faiz artaraq 1,327 milyard dollar olub.
İdxal əməliyyatlarında dövlət sektorunun payı 525,22 milyon dollar, özəl sektor - 742,402 milyon dollar (70,23 faiz), fiziki şəxslərin payı isə 59,87 milyon dollar (5,24 faiz) olub.