Azərbaycan, Bakı, 5 aprel /Trend, müxbir A.Axundov/
Azərbaycanda beynəlxalq sığorta forumunun keçirilməsi məsələsi Azərbaycan Sığortaçılar Assosiasiyası (ASA) təsisçilərinin aprelin 14-də keçiriləcək iclasında müzakirə olunacaq. Bu barədə çərşənbə axşamı Trend-ə ASA Müşahidə Şurasının sədri Azər Əliyev bildirib.
"Bu iclas zamanı forumun keçirilməsi barədə qərar da qəbul olunacaq. Müsbət qərar qəbul ediləcəyi halda, forumun keçiriləcəyi tarix yaxın gələcəkdə məlum olacaq. İlk forum yayda keçirilib", - Əliyev deyib.
2008-ci il iyulun 10-11-də Bakıda Azərbaycan Maliyyə Nazirliyinin dəstəyi və Azərbaycan Sığortaçılar Assosiasiyasının təşkilatçılığı ilə ilk Beynəlxalq sığorta forumu keçirilib.
Forum Azərbaycanın sığorta bazarının inkişaf tendensiyaları, Avropa ölkələrinin sığorta bazarının Azərbaycan sığorta sektorunun inkişafına təsiri, həyat sığortasının inkişafı, ölkənin maliyyə sisteminin hissəsi kimi sığorta bazarının təhlilinə və sığortada korporativ idarəetmə məsələlərinə həsr olunub.
2009-cu ildə ikinci sığorta forumunun keçirilməsi təxirə salınıb. ASA-nın bu qərarı dünya sığorta bazarının əhəmiyyətli dərəcədə azalması ilə bağlı olub.
"Əgər sığortaçılar forumun keçirilməsinə dair istəklərini bildirsələr, onda ASA təşkilatçı kimi çıxış edəcək, sponsorlar isə sığorta şirkətlərinin özləri olacaqlar", - Əliyev bildirib.
Onun sözlərinə görə, forumun keçirilməsində məqsəd Azərbaycanın və dünyanın sığorta bazarında baş verən dəyişikliklər barədə məlumat vermək, eləcə də digər ölkələrdən olan sığortaçılarla təcrübə mübadiləsi aparmaqdır.
"Azərbaycan hazırda sığorta sahəsində ciddi yüksəliş yaşayır. Və bu dəyişikliklərdən bəziləri yerli sığortaçıların bugünkü biliklərindən kənara çıxır. Ona görə də başqa ölkələrin sığorta şirkətlərinin nümayəndələri ilə ünsiyyət, yeni əlaqələrin qurulması sığorta sahəsində dünyagörüşünün genişlənməsinə və yeni ideyaların yaranmasına kömək edəcək", - Əliyev bildirib.
Azərbaycanda 28 sığorta və bir təkrar sığorta şirkəti fəaliyyət göstərir. Şirkətlərin hamısı ASA-nın üzvləridir. Azərbaycan Sığortaçılar Assosiasiyası 2006-cı ilin dekabrında təsis olunub.