Azərbaycan, Bakı, 5 aprel /Trend, müxbir A.Axundov/
Azərbaycanın həyat sığortası şirkəri "Qala Həyat"ın sığortanın dörd könüllü və bir icbari növü üzrə xidmətlərin göstərilməsinə icazəsi var. Bu barədə çərşənbə axşamı "Qala Həyat" sığorta şirkətinin Direktorlar Şurasının, həmçinin, "AzRe Reinsurance" təkrar sığorta şirkətinin İdarə Heyətinin sədri Çingiz Mehdiyev deyib. "Qala Həyat" "Qala Sığorta"nın fəaliyyətinin yenidən qurulması əsasında yaradılıb. Şirkət aktiv fəaliyyətə 2011-ci ildən başlayıb.
Onun sözlərinə görə, şirkətin icbari sığorta üzrə paketi "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası haqqında" qanunda göstərildiyi kimidir.
Mehdiyevin sözlərinə görə, şirkətin könüllü sığorta paketinə ölüm hallarından sığorta, əmək qabiliyyətinin itirilməsinin sığortası, sağalmaz xəstəliklərdən həyat sığortası və ipoteka krediti üzrə borcalanların həyat sığortası daxildir.
"Ölüm hallarından sığorta sığortaçının ölməsi halında sığorta ödənişinin edilməsini nəzərdə tutur. Əmək qabiliyyətinin sığortalanması mütəmadi sığorta ödənişlərini nəzərdə tutmaqla xəstəlik və ya bədbəxt hadisə nəticəsində əmək qabiliyyətini tam və ya qismən itirən sığorta olunanın gəlir itkilərini ödəmək məqsədi güdür. Sağalmaz xəstəliklərdən sığorta və ipoteka kreditləri üzrə borcalanların həyat sığortası sığorta olunanın səhhətində onun həyatını təhlükə altına qoyan xəstəlik müəyyən edildikdə sığorta ödənişinin həyata keçirilməsini nəzərdə tutur", - Mehdiyev qeyd edib.
Yanvar-fevralda şirkətin yığımları 912,157 min manat təşkil edib. Ödənişlər isə olmayıb.
Hazırda Azərbaycanda həyat sığortası üzrə 3 şirkət - "Atəşgah Həyat", "Qala Həyat" və "PAŞA Həyat" fəaliyyət göstərir. Onların yanvar-fevralın fəaliyyət yekunları üzrə sığorta haqları 2,5 milyon manatı ötüb. Bununla yanaşı, istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə yığımları 1,9 milyon manat olub.
Həyat sığortasının digər növləri üzrə yığımlar bu müddət ərzində 14,508 min manatlıq ödənişlə (1,63 faiz) 624,952 min manat (yığımların ümumi həcminin 1,94 faizi) olub.
Aprtelin 5-nə olan rəsmi məzənnə 0,7926 AZN/USD təşkil edir.
