Azərbaycan, Bakı, 14 aprel /Trend, müxbir N.İsmayılova/
Gələcəkdə Azərbaycanda vergiödəyicilərin pasportlaşdırılması mütəmadi əsasda keçiriləcək. Trend-in məlumatına görə, bu barədə cümə axşamı mətbuat konfransında vergilər naziri Fazil Məmmədov deyib.
"İndiki pasportlaşdırmanın müddəti mayın sonunadək müəyyənləşdirilib, lakin hesab edirəm ki, bu müddət uzadılacaq, çünki pasportlaşdırma yalnız bazar günlərində keçirilir. Lakin nazirliyin strukturunda dəyişikliklər olduqdan sonra pasportlaşdırma onun fəaliyyətinin müntəzəm növünə çevirləcək", - nazir bildirib.
Onun sözlərinə görə, artıq ilkin nəticələr var. Bu nətəcələr diqqətlə təhlil edilməlidir. Pasportlaşdırma zamanı qanunsuz sahibkarlıq, uçota alınmadan fəaliyyət, qanunsuz icarə kimi pozuntular aşkar edilib.
Fevralın 1-dən etibarən Vergilər Nazirliyi tərəfindən sahibkarlıq fəaliyyətini həyata keçirən vergiödəyicilərin və təsərrüfat subyektlərinin (obyektlərinin) pasportlaşdırılmasına başlanıb. Tədbir nazirlik əməkdaşları tərəfindən fərdi müşahidələr, şifahi sorğu yolu ilə bütün respublika ərazisində keçirilir. Vergiödəyicilərdən alınan məlumatlar da cəlb ediləcək. Vergiödəyicilərdən alınan məlumatlar vergiödəyicilərin pasportlaşdırılması formasına salınacaq. Pasportlaşdırmanın nəticələrinə əsasən məlumatlar yerli vergi orqanları tərəfindən ümumiləşdiriləcək və beş gün ərzində avtomatlaşdırılmış AVİS sisteminə daxil ediləcək. Bundan sonra məlumatların inventarizasiya prosesinə başlanacaq.