...

İri beynəlxalq investorların Azərbaycanın sığorta bazarına marağı yaxın 2-3 ildə bərpa olunacaq

Biznes və iqtisadiyyat xəbərləri Materials 16 Aprel 2011 14:35 (UTC +04:00)

Trend-i buradan izləyin

Azərbaycan, Bakı, 16 aprel /Trend, müxbir İ.Xəlilova/

Yaxın 2-3 ildə Azərbaycanın sığorta bazarına digər iri beynəlxalq şirkətlərin daxil olmasına marağın artmasını gözləmək olar. Azərbaycan Maliyyə Nazirliyi nəzdində Dövlət Sığorta Nəzarəti Xidmətinin rəhbəri Namiq Xəlilov bu fikirdədir.

"2008-ci ilədək Azərbaycanın sığorta bazarına böyük maraq var idi və bəzi şirkətlər artıq ilkin danışıqlar aparırdılar, lakin dünya maliyyə böhranı ilə əlaqədar olaraq real maraq göstərən əksər şirkətlərdə öz gələcək investisiya planlarını təxirə salmağa məcbur edən müəyyən problemlər yarandı", - Xəlilov qeyd edib.

Dövlət Sığorta Nəzarəti Xidmətinin rəhbəri hesab edir ki, 2008-ci ilin martında qüvvədə olan "Sığorta fəaliyyəti haqqında" qanuna uyğun olaraq, Azərbaycanın sığorta şirkətlərində xarici kapitalın iştirakına qoyulan məhdudiyyətin ləğvi Azərbaycanın sığorta bazarının investisiya cəlbediciliyini artırmağa imkan verib.

"Bunun bariz nümunəsi Fransanın AXA şirkətinin ötən il ölkənin sığorta bazarına gəlməsidir. Əminəm ki, artıq yaxın illərdə biz başqa xarici sığortaçıların da Azərbaycana yüksək marağını görəcəyik", - Xəlilov əlavə edib.

Onun fikrincə, Azərbaycanın sığorta bazarına aparıcı beynəlxalq sığortaçıların gəlişi sözsüz ki, onun inkişafına müsbət təsir göstərəcək. Başlıcası odur ki, bu şirkətlər dünyanın onlarla ölkələrində uzun illər boyunca topladıqları təcrübəni də gətirirlər.

"Rəqabət səviyyəsinə gəldikdə, sözsüz ki, o xüsusilə də pərakəndə sığorta seqmentində artacaq. Güman edirəm ki, bazarımıza daxil olan xarici şirkətlər məhz bu istiqamətdə daha çox fəallıq göstərəcəklər. Təcrübə göstərir ki, bazarın əsas potensialı - kütləvi istehlakçı - əhali, kiçik və orta biznesdir", - Xəlilov vurğulayıb.

Prinsipcə, dünyada artıq kütləvi istehlakçılarla iş alqoritmi - agent şəbəkəsi, informasiya texnologiyaları, bu istehlakçıların tələblərinə cavab verən aydın və əlçatan məhsullar yaranıb.

Başlıca məsələ ondan ibarətdir ki, yerli sığortaçılardan kim öz fəaliyyətini belə yanaşmalara uyğunlaşdıra bilər ki, bazarda rəqabətli olsun. "Mən mümkün hesab edirəm ki, bizim hansısa şirkətimiz böyük xarici iştirak olmadan rəqabətqabiliyyətli ola bilər. Lakin təbii ki, iri beynəlxalq oyunçuların üstünlüyü onların bir çox bazarlarda tətbiq etdiyi toplanmış təcrübədədir və bu təcrübəni onlar Azərbaycanda da tətbiq edə bilərlər", - Xəlilov vurğulayıb.

Onun sözlərinə görə, bizim şirkətlər onlardan öyrənsələr və müəyyən prinsiplərə əməl etsələr, rəqabət kifayət qədər yüksək ola bilər. "Və heç də doğru deyil ki, bütün yerli şirkətlər rəqabətdə uduzacaqlar", - o qeyd edib.

Hazırda ölkədə 28 sığorta şirkəti (o cümlədən beş xarici kapitalın iştirakı ilə), bir təkrar sığorta və altı broker şirkəti (o cümlədən beş xarici kapitalın iştirakı ilə) fəaliyyət göstərir.

Birinci rübdə ölkədə fəaliyyət göstərən bütün şirkətlərin sığorta haqları 49,129 milyon manat (9,9 faiz artım) təşkil edib. Bu müddət ərzində isə 12,975 milyon manat məbləğində (26 faiz artım) ödənişlər edilib.

Aprelin 16-na olan rəsmi məzənnə 0,7927 AZN/USD təşkil edir.

Xəbər lenti

Xəbər lenti