Azərbaycan, Bakı, 20 aprel /Trend, müxbir A.Axundov/
Azərbaycan Respublikası Dövlət Neft Fondu (ARDNF) 2011-ci ilin birinci rübündə fondun investisiya portfelinin qısamüddətli alətlərə yerləşdirilməsi siyasətini davam etdirib və beş ilədək qoyulan vəsaitlərin payına aktivlərin 96,25 faizi düşür.
Çərşənbə axşamı fondun icraçı direktoru Şahmar Mövsümovun mətbuat konfransında dediyinə görə, fondun investisiya portfelinin 34,75 faizi qiymətli kağızlarda beş il müddətinə, 30,63 faizi bir ildən üç ilədək, 30,79 faizi üç ildən beş ilədək, 3,75 faizi beş ildən artıq müddətə, o cümlədən 0,08 faizi səhmlərdə yerləşdirilib.
Mövsümovun sözlərinə görə, martın 31-nə olan məlumata görə, fondun aktivlərinin 44,9 faizi qiymətli kağızlarda "AAA", 22,12 faizi "AA", 30,06 faizi "A", 2,85 faizi "BBB", 0,07 faizi digər reytinqlərdə yerləşdirilib. Fondun aktivləri qiymətli kağızlarda investisiya reytinqindən aşağı yerləşdirilə bilməz.
ARDNF-nin aktivləri qismən qiymətli kağızlarda, pul bazarının alətlərində (depozitlər, bank hesabları) yerləşdirilib. Səhmlərdə fondun aktivlərinin cəmi 0,08 faizi yerləşdirilib. Hazırda fondun aktivlərinin 31,21 faizi agentlik və beynəlxalq təşkilatların istiqrazlarına, suveren borc kağızlarına - 17,54 faiz, maliyyə istiqrazlarına - 21,33 faiz, korporativ istiqrazlara - 14,2 faiz, qısamüddətli kommersiya kağızlarına - 6,79 faiz, zəmanətli istiqrazlara - 4,92 faiz, bələdiyyə istiqrazlarına - 0,11 faiz və pul bazarının depozit və alətlərinə - 3,82 faiz yatırılıb.
Onun sözlərinə görə, fondun aktivlərinin yerləşdirilməsinin coğrafiyası belədir: 68,61 faiz - Avropa ölkələrində, 12,74 faiz - Şimali Amerikada, 6,92 faiz - beynəlxalq maliyyə təşkilatlarında, 5,28 faiz - Asiyada, 5,67 faiz - inkişaf etməkdə olan ölkələrdə və 0,78 faiz - Yaxın Şərqdə yerləşdirilib.
