Azərbaycan, Bakı, 20 aprel /Trend, müxbir N.İsmayılova/
Azərbaycan bankı "Nikoil Bank" islam bankçılığının ilk məhsulu "Vadi-əd-daminə" üzrə xidmətlərin göstərilməsinin birinci ayında 150 min manat cəlb edə bilib. Bu barədə çərşənbə günü Trend-ə bankın Biznesin inkişafı departamentinin islam bankçılığı məhsulunun inkişafı üzrə aparıcı meneceri Anar Yusufzadə deyib.
Məhsul əmanət depozitidir. Onun üstünə faizlər gəlmir, hesabdan vəsaitləri istənilən vaxtda götürmək olar.
"Bankın ilk məhsulu işə salındıqdan bir ay ərzində "Nikoil Bank"da islam bankçılığının tələblərinə və Azərbaycan qanunvericiliyinin normalarına zidd olmayan 100-ə yaxın hesab açılıb", - Yusufzadə bildirib.
Onun sözlərinə görə, əhalinin böyük marağı var və bank ilin sonunadək bu məhsul üzrə portfelin xeyli artacağına ümid edir.
Hazırda "Nikoil Bank" belə xidmət təklif edən ilk Azərbaycan bankıdır. Əvvəllər islam bankçılığı üzrə xidmətlərin göstərilməsi ilə bağlı Azərbaycan Beynəlxalq Bankı, "Amrahbank", "Turanbank", "Texnikabank" öz istəklərini bildirmişdilər.
"Nikoil Bank" Azərbaycanda 1997-ci ildən fəaliyyət göstərir. 2008-ci ildə "Topaz İnvestments" şirkəti tərəfindən "Nikoil Bank"ın nəzarət paketi alındıqdan sonra səhmdarların iştirakı aşağıdakı kimidir: "Topaz İnvestments" - 53,1%, "Nikoil" QSC - 28,7%, "Uralsib-İnvest" MMC - 13,9% və "ISR Holding" - 4,3%.
Aprelin 20-nə olan rəsmi məzənnə 0,7918 AZN/USD təşkil edir.
