Azərbaycan, Bakı, 26 aprel /Trend, müxbir N.İsmayılova/
Gürcüstan Azərbaycana kənd təsərrüfatının inkişafı məqsədilə logistik və distribüter mərkəzlərinin yaradılması üzrə təcrübə mübadiləsini təklif edir. Bu barədə Bakıya birgünlük səfəri zamanı Trend-ə müsahibəsində Gürcüstanın iqtisadiyyat və davamlı inkişaf naziri xanım Vera Kobaliya deyib.
"İndi Azərbaycanda kənd təsərrüfatının inkişafına yönələn logistik və distribüter mərkəzləri tikilir. Biz də bu istiqamətdə işləyirik, çünki Gürcüstan indiyədək kənd təsərrüfatı məhsullarının çox hissəsini idxal edir və biz idxalı daxili istehsalla əvəzləmək istəyirik", - Kobaliya qeyd edib.
Onun sözlərinə görə, ölkələrin bu sahədə təcrübə mübadiləsi etməsi və həm Gürcüstanda, həm də Azərbaycanda kənd təsərrüfatı sektorunun gücləndirilməsinə yönələcək logistik mərkəzlərin yaradılması düzgün olardı.
"Bu, gələcəkdə vahid regional mərkəzin yaradılmasına xidmət edərdi", - nazir bildirib.