Azərbaycan, Bakı, 27 aprel /Trend, müxbir A.Axundov/
Hazırda Azərbaycanda fəaliyyət göstərən turizm şirkətlərindən vergitutmanın sadələşdirilməsinə baxılmır. Trend-in məlumatına görə, bu barədə çərşənbə günü jurnalistlərə Azərbaycan Mədəniyyət və Turizm Nazirliyinin Turizm departamentinin rəhbəri Aydın İsmiyev deyib.
Bundan əvvəl Sahibkarlar Konfederasiyası nümayəndələrinin, dövlət strukturları və sahibkarların iştirakı ilə keçirilən tədbirlərdə regionlarda fəaliyyət göstərən bəzi turizm şirkətlərinin 5 il müddətinə ƏDV-dən azad edilməsini, sadələşdirilmiş vergi sistemi üzrə işləyən fiziki və hüquqi şəxslər, turizm firmaları, mehmanxana və istirahət mərkəzləri üçün ƏDV-yə illik dövriyyədən keçid limitinin ikiqat artırılmasını nəzərdə tutan təkliflər səsləndirilmişdi.
Bununla yanaşı, bundan əvvəl Azərbaycan Turizm Assosiasiyası da Mədəniyyət və Turizm Nazirliyinə vergitutma sahəsində bir sıra təkliflər təqdim etmişdi.
2011-ci ilin "Turizm ili" elan edilməsi ilə əlaqədar assosiasiya həmçinin təklif edir:
- Bakıda və Abşeron yarımadasında bələdçilər üçün vahid metodiki vəsaitlərin hazırlanması və təsdiq edilməsi:
- turizm şirkətləri, mehmanxana və restoranların əməkdaşlarının hazırlıq səviyyəsinin artırılması üçün ixtisaslaşdırılmış treninqlərin keçirilməsi;
- Azərbaycanın bütün sərhəd-buraxılış məntəqələrində turistlərə müvafiq xidmətlərin göstərilməsi üçün turizm şirkətlərinə və təşkilatlarına yerlərin ayrılması;
- orta və kiçik turizm biznesinə dəstək göstərilməsi məqsədilə təyinatı üzrə güzəştli kreditlərin verilməsi;
- Azərbaycanda turizm axınının artımı üçün turist vizalarının verilməsinin sadələşdirilməsi üzrə təkliflərin hazırlanması;
- turizm sahəsinin işçiləri üçün ayrıca peşə gününün təsis olunması və onların dövlət tərəfindən mükafatlandırılması üzrə təkliflərin hazırlanması;
- xarici ölkə səfirliklərinin nümayəndələri üçün Azərbaycanın turizm regionlarına infoturların təşkili;
- mehmanxana və mehmanxana tipli obyektlərin Azərbaycan üzrə soraq kitabçaları ilə təmin olunması və s.
Təkliflər habelə xarici vətəndaşların Azərbaycanın tarixi, dini, mədəni, kulinariya və turizmin digər növləri üçün imkanları haqqında məlumatlandırılmasına yönəlmiş digər tədbirlərin təşkili və təkmilləşdirilməsinə də aiddir.
Təkliflərin sırasında Azərbaycana gələn turistlər üçün vizaların rəsmiləşdirilməsi qaydalarının sadələşdirilməsi də var ki, bununla əlaqədar aprelin əvvəlində Milli Məclis "Ölkədən getmə, ölkəyə gəlmə və pasportlar haqqında" qanuna bir sıra dəyişikliklər edib.
Bu dəyişikliklərin əsas üstünlüyü ondan ibarətdir ki, belə vizalar həm teleqraf poçtu, həm də elektron qaydada rəsmiləşdirilə bilir. Vizanın verilməsindən imtina edildikdə, bunun əsaslandırılmış səbəbləri göstərilməlidir. Bu halda turistlərə gediş-gəliş üçün birdəfəlik vizalar verilə bilər, bu vizalar üzrə ölkədə qalma müddəti isə 30 gün səviyyəsində müəyyənləşdirilib.