Azərbaycan, Bakı, 3 may /Trend, müxbir N.İsmayılova/
Azərbaycan cari ildə avrobondların buraxılması üzrə planlarını təxirə salıb. Bu barədə çərşənbə axşamı Azərbaycanın maliyyə nazirinin müavini Azər Bayramov deyib.
"İndi dünya bazarlarında vəziyyət əvvəlkindən yaxşıdır, lakin bununla belə, istədiyimiz kimi əlverişli deyil, çünki bazarda "bahalı pullar" var. Buna görə bu il avrobondların buraxılması az güman ediləndir", - Bayramov bildirib.
Onun sözlərinə görə, məhz bu səbəbdən Azərbaycan dövlət büdcəsinin kəsirinin məbləğini azaldır.
Əvvəllər suveren bondların buraxılışının ilkin həcmi 300 milyon dollar səviyyəsində gözlənilirdi. Sonradan buna yenidən baxılaraq onun 500 milyonadək artırılacağı bildirildi.
Hökumətin avrobondların ilk emissiyasının həyata keçirilməsi üzrə menecerləri investisiya bankları - "Deutsche Bank AG London" və "Citigroup Global Markets Limited" seçilib.
Hökumətin dünya kapital bazarına çıxması ilə bağlı planlarının qeyri-müəyyənliyi səbəbindən ölkənin təsərrüfat subyektləri də suveren istiqrazların buraxılışını gözləyərək avrobondların xarici bazarlarda yerləşdirilməsi üzrə planlarını hələ ki həyata keçirməyiblər.
İstisnanı "Azərbaycan Dəmir Yolları" QSC təşkil edib. O, bu günlərdə ümumi məbləği 125 milyon dollar olan və 5 il müddətinə "Loan Participation Notes" tipli avroistiqrazların debüt buraxılışını həyata keçirən ilk dövlət şirkəti olub.
Əvvəllər ARDNŞ də (Azərbaycan Respublikası Dövlət Neft Şirkəti) bildirirmişdi ki, gələn il avrobondların "road show"sunu keçirməyi planlaşdırır. Bununla belə, bundan əvvəl ARDNŞ-nin iqtisadi məsələlər üzrə vitse-prezidenti Süleyman Qasımovun dediyi kimi, şirkətin hüquqi konsultantına artıq müqavilənin və investorlar üçün huquqi prospektin hazırlanması tapşırılıb. Bundan sonra şirkət müxtəlif bazarlarda təqdimat keçirmək niyyətindədir.
Qasımovun sözlərinə görə, avrobondların ilk buraxılışının emissiyalarının həcmi 500 milyon dollar təşkil edəcək. Onlar hər biri 100 milyon dollar məbləğində beş tranş vasitəsilə beş il müddətinə yerləşdiriləcək.
Bundan başqa, Azərbaycanın bir sıra bankları da bu məsələ ilə bağlı planlarını təxirə salıblar. Azərbaycan Beynəlxalq Bankı 200 milyon dollar, "Unibank" 150 milyon dollar, "Bank Standard" 150-200 milyon dollar məbləğdə yerləşdirmə planlaşdırdıqlarını bildirmişdilər.