Azərbaycan, Bakı, 12 may /Trend, müxbir A.Axundov/
Azərbaycanın sığorta şirkəti "Qarant Sığorta" 2011-ci ildə 8-9 milyon manat yaxın məbləğdə sığorta mükafatı toplamağı planlaşdırır. Bu barədə "Qarant Sığorta" şirkətinin idarə heyətinin sədri Vaqif Həsənov cümə axşamı Trend-ə müsahibəsində bildirib.
"Ötən illə müqayisədə satışımızı 30 faiz artırmağı planlaşdırırıq. Onu da nəzərə almaq lazımdır ki, biz ötən il yeddi milyon manatdan artıq mükafat toplamışdıq, bu il 8-9 milyon manat yaxın məbləğdə sığorta mükafatı toplamağı planlaşdırırıq", - Həsənov deyib.
2010-cu ildə şirkətin mükafatları yeddi milyon manatı ötüb, ödənişləri 2,4 milyon manat təşkil edib. 2009-cu illə müqayisədə yığlmların həcmi 68 faiz artıb.
Onun sözlərinə görə, 2011-ci ildə şirkət fərdi satış bazarına istiqamətlənib.
"Biz bu məqsədə nail olmaq üçün əlimizdən gələni edirik, bununla əlaqədar sığorta agentliyimizi açmışıq, telemarketinq departamenti yaratmışıq, həmçinin satış departamenti də bu məqsədlə yaradılıb. Hazırda fərdi müştərilər üçün böyük ofis açmağı planlaşdırırıq", -Həsənov bildirib.
"Qarant Sığorta" şirkəti öz faktiki fəaliyyətinə 2008-ci ilin əvvəlindən başlayıb. "Qarant Sığorta" ZQAN Holdingin tərkibinə daxildir.
Mayın 12-nə rəsmi məzənnə 0,7908 AZN/USD təşkil edir.
