Azərbaycan, Bakı, 4 iyun /Trend, müxbir N.İsmayılova/
Azərbaycandakı qızıl istehsalçısı "Anglo Asian Mining Plc" şirkəti gələn ilin sonunadək "Qoşa" yatağında 25-30 min unsiya qızıl hasil etməyi planlaşdırır. Bu barədə şənbə günü Trend-ə şirkətin baş direktoru Rza Vəziri deyib.
"Əvvəllər şirkət ölkə hökumətinə bu yataqda qızıl ehtiyatlarının aşkar edilməsini sübut edən sənədi təqdim edib. Sənədi Azərbaycan tərəfi qəbul edib. Şirkət artıq yeni yatağın işlənməsi üçün zavodun tikintisinə başlayıb. Belə ki, gələn ilin sonunadək yataqda 25-30 min unsiya qızılın hasil edilərək bazara çıxarılması planlaşdırılır", - Vəziri bildirib.
Onun sözlərinə görə, "Ordubad", "Maarif" və "Gədəbəy" yataqlarında da kəşfiyyatın müsbət nəticələri var.
"Son kəşfiyyat məlumatlarına əsasən, bizim qiymətləndirmələrimizə görə, "Gədəbəy" yatağında ehtiyatların 300 min unsiyadan 700 min unsiya qızıladək artması proqnozlaşdırılır", - o qeyd edib.
"Anglo Asian Mining plc" 1997-ci ilin avqustunda Azərbaycan hökuməti ilə imzalanan PSA tipli (hasilatın pay bölgüsü) saziş əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir. Müqaviləyə əsasən, yataqlarda 400 tona yaxın qızıl, 2500 ton gümüş və 1,5 milyon ton misin hasil edilməsi planlaşdırılır.
İlk qızıl və gümüş "Gədəbəy" yatağında 2009-cu ilin mayında hasil edilib.