Azərbaycan, Bakı, 14 iyun /Trend, müxbir İ.Xəlilova/
2011-ci ilin yanvar-may aylarında Azərbaycanın ÜDM 2010-cu ilin analoji göstəricisi ilə müqayisədə 0,8 faiz artıb. Bu barədə çərşənbə axşamı Dövlət Statistika Komitəsindən məlumat verilib. Cari qiymətlərdə ÜDM göstəricisi 17,6 milyard manat təşkil edib.
İllik hesablamada nominal ÜDM 10,2 faiz artıb.
Adambaşına düşən ÜDM-in həcmi 1952,4 manat (2459,9 dollar) təşkil edib.
İl ərzində 6,6 faiz artan qeyri-neft sektorunun payı ÜDM-də 47,7 faiz (8,4 milyard manat) təşkil edib, neft sektorunda əlavə dəyərin istehsalı 4,3 faiz azalıb. Bu, ÜDM-in nisbətən aşağı artım tempinə səsbəb olub.
İqtisadiyyatın bütün sahələrində məhsul istehsalının ümumi həcmi 2,3 faiz azalaraq ÜDM-in 65 faizini təşkil edib. Orada ÜDM-in əsas hissəsi - 55,1 faizi (9,7 milyard manat) sənayenin payına düşür. Xidmətlər sahəsində əlavə dəyərin istehsalı 2010-cu ilin yanvar-may ayları ilə müqayisədə 7 faiz artaraq ÜDM-in 28,7 faizini təşkil edib.
Yanvar-mayda kənd təsərrüfatında, ovçuluq və meşəçilik sektorunda 549,9 milyon manat əlavə dəyər istehsal olunub. Bu, ÜDM-in 3,1 faizini təşkil edir. Tikinti sektorunda - 1 191,6 milyon manat (6,8 faiz), nəqliyyat və anbar təsərrüfatında - 1161,8 milyon manat (7,9 faiz), rabitə və informasiyada - 320,8 milyon manat (1,8 faiz), sosial və digər xidmətlərin göstərilməsində - 1 933,2 milyon manat (11 faiz), mehmanxana biznesi və xidmət sahələrində - 243,8 milyon manat (1,4 faiz) əlavə dəyər istehsal edilib.
İyunun 14-nə olan rəsmi məzənnə 0,7882 AZN/USD təşkil edir.