Azərbaycan, Bakı, 16 iyun /Trend, müxbir N.İsmayılova/
Azərbaycan Mərkəzi Bankı (AMB) ölkədə ödəniş sistemlərinin fəaliyyəti üzərində nəzarət sahəsində öz nəzarət səlahiyyətlərini genişləndirmək niyyətindədir. Bu barədə cümə axşamı Trend-ə AMB-dən bildiriblər.
"Bu günə Mərkəzi Bankın səlahiyyətlərinə milli ödəniş sistemlərinin, eləcə də ölkədə fəaliyyət göstərən beş prosessinq mərkəzinin fəaliyyəti üzərində nəzarət daxildir. Qanun layihəsinə hazırlanan dəyişikliklərə əsasən, AMB-nin bu sahədə səlahiyyətlərini genişləndirmək təklif olunur", - bankdan bildiriblər.
AMB ölkə daxilində bütün ödəniş sistemlərinin, o cümlədən bank olmayan kredit təşkilatları kimi sistem institutlarının fəaliyyətinə nəzarət etmək niyyətindədir. "Azərbaycanda "GoldenPay" kimi özəl ödəniş sistemləri də fəaliyyət göstərir. Onların fəaliyyəti hələ ki AMB-nin nəzarətindən kənardadır. Qanun layihəsinə dəyişikliklər edildikdən sonra belə ödəniş sistemləri üzərində nəzarət Mərkəzi Bankın səlahiyyətlərinə daxil ediləcək", - AMB-dən məlumat verilib.
Hazırda Azərbaycanda beş prosessinq mərkəzi - "Azericard", "MilliKart", "TexKart", "Kapital Kart" və "RoyalCard", eləcə də 2 milli ödəniş sistemləri - iri ödənişlərin banklararası sistemi (AZIPS) və kiçik ödənişlərin klirinq sistemi (XONKS) fəaliyyət göstərir. AMB-nin iri ödənişlər (AZIPS) və kiçik ödənişlər (XONKS) üzrə milli ödəniş sistemləri "2005-2007-ci illər üçün milli ödəniş sisteminin inkişafı üzrə dövlət proqramı" çərçivəsində yaradılıb. XONKS-ın bazasında kommunal ödənişlər üzrə mərkəz yaradılıb. O, onlayn rejimdə vəsaitləri köçürməyə və hesabatları almağa imkan verir. Bunun nəticəsində ayrı-ayrı banklarda sui-stifadə hallarından yayınmaq üçün imkan yaranır.
