Azərbaycan, Bakı, 22 iyun /Trend, müxbir İ.Xəlilova/
Azərbaycanın Vergilər Nazirliyi vergiödəyicilərə sadələşdirilmiş vergi sisteminin şamil edildiyi illik dövriyyənin səviyyəsinin artırılmasını məqsədəuyğun hesab etmir. Çünki hazırkı səviyyə nəinki keçmiş postsovet məkanında, həm də Şərqi Avropa ölkələrində ən yüksək göstəricidir. Nazirliyin Vergi siyasəti və strateji araşdırmalar Baş İdarəsinin rəisi Akif Musayev belə hesab edir.
2010-cu ilədək sadələşdirilmiş sistem üzrə vergi rüblük dövriyyəsi 22.5 min manatı ötməyən fiziki və hüquqi şəxslər tərəfindən ödənilirdi. Bu ildən həmin vergi illik dövriyyəsi 150 manatadək olan hüquqi şəxslərə və illik dövriyyəsi 90 min manatdək olan fiziki şəxslərə şamil edilir. Fiziki və hüquqi şəxslər üçün bu limitin artırılacağı halda, onlar 10 gün ərzində Vergilər Nazirliyində ƏDV ödəyicisi kimi qeydiyyatdan keçməlidirlər.
Turizm şirkətləri sadələşdirilmiş vergi üzrə illik dövriyyənin artırılması haqqında təkliflə çıxış edirlər. Bu təklif çərşənbə günü Azərbaycanda turizmin problemlərinə və perspektivlərinə həsr olunan konfransda səsləndirilib. Bundan əvvəl sadələşdirilmiş vergi həddinin artırılması barədə təkliflə parlamentin İqtisadi siyasət komitəsinin sədr müavini Çingiz Əsədullayev çıxış etmişdi. Bununla yanaşı, ABŞ Beynəlxalq İnkişaf Agentliyi (USAID) hesab edir ki, Azərbaycanda fiziki şəxslər üçün sadələşdirilmiş vergi həddi əlverişli səviyyədədir, lakin hüquqi şəxslər üçün sadələşdirilmiş vergi həddinin azaldılması lazımdır.
"Bu gün Azərbaycanda 365 min vergiödəyici var, onlardan 16 mini ƏDV ödəyicisidir. Bunu yaxşı göstərici adlandırmaq olmaz, lakin sadələşdirilmiş vergi üzrə illik dövriyyənin artırılması əlavə dəyər vergisinin ləğv edilməsinə gətirib çıxaracaq", - Musayev deyib.
ƏDV bütün əməliyyatlar üzərində nəzarət forması və mexanizmidir.
"Bir çox ölkələrdə bütün əməliyyatlar üzərində nəzarətin saxlanması məqsədilə ƏDV ödənişindən azad olunmaq anlayışı yoxdur", - Musayev bildirib.
Azərbaycanın Vergi Məcəlləsi çərçivəsində sıfır faiz dərəcəsi, 18 faiz və ƏDV ödənişindən azad olunma qüvvədədir.
"Ölkədə ƏDV ödənişindən azad olunma rejiminin mövcudluğu səbəbindən hətta beynəlxalq maliyyə hesabatlılığına keçidin həyata keçirilməsinə baxmayaraq, əlavə hesabatlılıq aparmamaq üçün ölkə əraizisində müştərilərlə qarşılıqlı münasibətlər üçün köhnə uçot sisteminin tətbiqi davam etdirilir. Bu prosesin asanlaşdırılması üçün azadolunmalara ehtiyac var, lakin bu, bütün müəssisələrə tətbiq edilə bilməz, əks halda böyük itkilərə yol açar", - Musayev hesab edir.
Azərbaycanda vergi yükü 13 faiz təşkil edir, halbuki 2006-cı ilin yekunlarına görə, ölkədə bu göstərici 20,7 faiz səviyyəsində idi.
İyunun 22-nə olan rəsmi məzənnə 0,7873 AZN/USD təşkil edir.