Azərbaycan, Bakı, 28 iyun /Trend, müxbir İ.Xəlilova/
Azərbaycan hökuməti Ümumdünya Ticarət Təşkilatına üzv ölkələrlə iyulun ikinci yarısında Cenevrədə ikitərəfli danışıqların keçiriləcəyini gözləyir. Bu barədə danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib.
"Danışıqların Azərbaycanın danışıqlar prosesində olduğu ölkələrin hamısı ilə keçiriləcəyi istisna edilmir. Lakin hər şey məhsul və tariflər üzrə yeni təkliflərin göndərildiyi üzv ölkələrin istəyindən asılı olacaq. Bugünə ölkələrdən heç biri danışıqlarda iştiraka razılıq verməyib", - Məmmədquliyev bildirib.
Bu gün Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti, Kanada və İsveçrə ilə ikitərəfli danışıqlar aparır.
Nazir müavininin sözlərinə görə, ÜTT-nin işçi qrupu ilə növbəti görüş (çoxtərəfli danışıqların IX raundu) oktyabrdan tez keçirilməyəcək.
Sonuncu görüş [VIII mərhələ] 2010-cu ilin oktyabrın 18-də keçirilib. Oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nin digər üzvləri ilə ticarət və xidmət məsələləri üzrə ikitərəfli danışıqlar aparılıb.
Azərbaycan danışıqlara 2004-cü ildən başlayıb.
Azərbaycan bu günədək Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalamaya razılıq verib.
Danışıqlar çərçivəsində Azərbaycan milli hüquqi bazanın ÜTT-nin tələblərinə uyğunlaşdırılması, qüvvədə olan ticarət rejiminin təkmilləşdirilməsi üzrə işləri davam etdirir. Təxminən 40-50 qanunvericilik aktı təşkilatın tələblərinə uyğunlaşdırılmalıdır ki, onlardan təxminən 30 sənəd artıq vahid şəklə salınıb və gələn il bu istiqamətdə işlər davam etdiriləcək.
Ötən il ÜTT katibliyi Azərbaycan üzrə işçi qrupun tərkibini genişləndirib və oraya daha dörd ölkəni - Ukrayna, Braziliya, Ekvador və İsveçrəni daxil edib. Bunun nəticəsində işçi qrupun üzvlərinin ümumi sayı Aİ-nin 27 ölkəsi də daxil olmaqla, 32-yə çatıb.
ÜTT yanında Azərbaycan üzrə işçi qrup 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.