Azərbaycan, Bakı, 29 iyun /Trend, müxbir A.Axundov/
Mayda Bakıda bir sot torpağın orta qiyməti 0,4 faiz azalaraq 14096 dollardan 14035 dollara çatıb. Bu barədə çərşənbə günü Trend-ə "Əmlak Bazarı İştirakçıları" İctimai Birliyindən məlumat verilib.
"Bakının torpaq bazarında qiymətlərin azalmasının əsas səbəbi tələbatın kəskin azalmasıdır", - məlumatda deyilir.
Qiymətlərin azalması şəhərin bütün zonalarında müşahidə edilib. Bununla yanaşı, mayda 0,1 faiz qiymət artımı Qaradağ və Xəzər rayonlarında müşahidə edilib.
Qiymətlərin ən yüksək azalması Sabunçu rayonunda (0,4 faiz) müşahidə edilib. Torpaq bazarında daha fəal Binəqədi və Xətai rayonları olub. Ən passivi isə Nəsimi rayonu olub.
Mayda ən bahalı torpaq sahəsi Bakının Nəsimi rayonunda ("Avropa" hoteli yaxınlığında) bir sot üçün 210 min dollara, ən ucuzu isə Abşeron rayonunda (Pirəküşkül qəsəbəsində) bir sot üçün 350 dollara təklif olunub.
Mayda Bakının torpaq bazarı üçün 776,1 hektar torpaq təklif edilib. Bunun 78,6 faizini boş sahələr təşkil edib, qalanı isə qeyri-yaşayış və köhnə ərazilərin payına düşür.
Bazarda torpağın ekspozisiya müddəti əvvəlki aya nisbətdə 1,1 faiz artıb.
