Azərbaycan, Bakı, 30 iyun /Trend, müxbir A.Axundov/
2010-cu ildə Azərbaycanın xarici mal dövriyyəsi 1993-cü illə müqayisədə 20,6 dəfə artıb. Bu barədə Dövlət Statistika Komitəsinin sədri Arif Vəliyev "Müstəqil Azərbaycanın inkişafı rəqəmlərdə" mövzusunda emi simpoziumda çıxışı zamanı deyib.
"1993-cü ildə xarici ölkələrlə ticarət dövriyyəsinin həcmi 1,4 milyard dollar olub, sonrakı illərdə ticarət əlaqələri genişlənib, 2010-cu ildə bu göstərici 27,9 milyard dollara çatıb", - Vəliyev qeyd edib.
Onun sözlərinə görə, hesabat dövrü ərzində Azərbaycanın ticarət tərəfdaşlarının sayı da artıb.
"1993-cü ildə 60 xarici ölkə ilə ticarət əlaqələri qurulmuşdusa, 2010-cu ildə bu əlaqələrin coğrafiyası genişlənib və 147 xarici dövlətlə idxal-ixrac əməliyyatları aparılıb", - Vəliyev əlavə edib.
Komitə sədrinin sözlərinə görə, xarici ticarətin liberallaşdırılması istiqamətlərində səmərəli və davamlı tədbirlər kompleksinin reallaşdırılması milli iqtisadiyyatın dünya təsərrüfat sisteminə inteqrasiyasına əlverişli zəmin yaradıb.
Azərbaycan Dövlət Gömrük Komitəsinin məlumatına görə, 2011-ci ilin yanvar-may aylarında Azərbaycanın mal dövriyyəsinin ümumi həcmi 14,073 milyard dollar təşkil edib ki, bu da ötən ilin müvafiq dövründəkindən 32,98 faiz çoxdur. Xarici ticarət dövriyyəsindən 7,093 milyard dollar həcmində müsbət saldo yaranıb
İlin ilk beş ayı ərzində ixrac əməliyyatları 10,583 milyard dollar təşkil edərək 2010-ci ilin analoji dövründəkinə nisbətən 29,43 faiz artıb. İxrac əməliyyatlarında dövlət sektorunun payı 10,11 milyard dollar (95,5 faiz), özəl sektorun payı 0,44 milyard dollar (4,2 faiz), fiziki şəxslərin payı isə 33,02 milyon dollar (0,3 faiz) təşkil edib.
Yanvar-may ayları ərzində idxal 3,49 milyard dollar təşkil edib ki, bu da ötən ilin analoji dövrü ilə müqayisədə 45,06 faiz çoxdur.
İdxal əməliyyatlarında dövlət sektorunun payı 1,257 milyard dollar (36 faiz), özəl sektorun payı 2,066 milyard dollar (59,2 faiz), fiziki şəxslərin payı isə 166,4 milyon dollar (4,8 faiz) təşkil edib.
