Azərbaycan, Bakı, 19 iyul /Trend, müxbir N.İsmayılova/
İyulun 1-nə Azərbaycan bankı "Texnika Bank"ın aktivləri ilin əvvəlindən 11 faiz və ya 60 milyon manat artaraq 547 milyon manat təşkil edib. Bu barədə çərşənbə axşamı Trend-ə bankın idarə heyətinin sədri Samir Hüseynov bildirib.
"Fiziki şəxslərin depozitləri ilin əvvəlindən 23 milyon manat artaraq 206 milyon manata çatıb. Bankın kredit portfeli 56 milyon manat artaraq 382 milyon manat təşkil edib", - Hüseynov deyib.
Onun sözlərinə göğrə, ilin əvvəlindən bankın buraxdığı plastik kartların sayı 36 faiz artaraq 66,5 min ədədə çatıb. İlin sonunadək bank kartların sayını 100 min ədədə çatdırmağı planlaşdırır.
Bankın bankomatlarının sayı 60-dan 78-dək artıb və yaxın iki ayda daha 60 bankomat quraşdırılacaq.
Hüseynovun sözlərinə görə, bank ilin əvvəlindən POS-terminalların sayını 250 ədəddən ilin birinci yarısının yekunları üzrə 885 ədədə çatdırıb.
Bank 35 filiala və beş şöbəyə malikdir.
"Texnika Bank" bank bazarında 1993-cü ildən fəaliyyət göstərir və 2007-ci ilədək 100 faiz Azərbaycan bankı olub. Bu gün bankın majoritar səhmdarı kimi "World Wines" şirkəti çıxış edir. Şirkət bankın səhmlərinin 75 faizinə sahibdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın "Kazimir Investment Caspian Fund" holdinqi isə səhmlərin 10 faizinə nəzarət edir.
İyulun 19-na olan rəsmi məzənnə 0,7862 AZN/USD təşkil edir.