Gürcüstan, Tbilisi, 25 iyul /Trend, müxbir N.Kirsxaliya/
Azərbaycan Gürcüstanın ən iri xarici ticarət tərəfdaşları arasında ikinci yeri tutur. 2011-ci ilin yanvar-iyun aylarında Gürcüstan və Azərbaycan arasında xarici ticarət dövriyyəsi 442 316,1 min dollar təşkil edib. Bu barədə Trend-ə Gürcüstan Statistika Komitəsindən bildiriblər.
Gürcüstan Azərbaycana 154 159,3 min dollar məbləğdə məhsul ixrac, 287 719,8 min dollar məbləğdə isə idxal edib.
Gürcüstanın bütün xarici ticarət dövriyyəsinin 10,7 faizi Azərbaycanın payına düşür.
Gürcüstanın xarici ticarət dövriyyəsində birinci yerdə Türkiyə (dövriyyənin 16,3 faizi), üçüncü yerdə isə Ukraynadır (10,3 faiz).
2011-ci ilin yanvar-iyun ayları ərzində Gürcüstanın xarici ticarətinin ümumi həcmi (qeyri-mütəşəkkil ticarət istisna olmaqla) ötən ilin analoji dövrü ilə müqayisədə 38 faiz artıb və 4 117 milyon dollar təşkil edib. Bu halda ixracın payına 1037 milyon dollar (44 faizlik artım), idxalın payına isə 3079 milyon dollar (26 faiz çox) düşür.
Hesabat dövrü ərzində mənfi ticarət balansı 2042 milyon dollar təşkil edib (32 faiz çox).
Bu müddətdə Gürcüstanın Aİ ölkələri ilə ticarət dövriyyəsi 1031 milyon dollar təşkil edib. Bu, ötən ilin analoji dövründən 31 faiz çoxdur. Bu halda ixrac 172 milyon dollar (26 faiz çox), idxal 859 milyon dollar (32 faiz çox) təşkil edib.
Gürcüstanın xarici ticarət dövriyyəsində bu ölkələrin payı 25 faiz, o cümlədən ixracda 17 faiz, idxalda 28 faiz (2010-cu ilin analoji dövr göstəriciləri müvafiq olaraq 26, 19 və 29 faiz) təşkil edir.
