Azərbaycan, Bakı, 8 avqust /Trend, müxbir İ.Xəlilova/
Dünya Bankı (DB) Azərbaycana özəl sektor və ölkə hökuməti arasında birabaşa dialoqun qurulması ilə bağlı dünya təcrübəsindən istifadəni təklif edir.
"Azərbaycanda biznes nümayəndələrinin öz tələbat və təşəbbüsləri barədə məlumat verə bilmələri üçün özəl sektor və hökumət arasında birabaşa müzakirələrə ehtiyac var", - DB-nin Bakı nümayəndəliyindən qeyd ediblər.
Dünyanın əksər ölkələrində təxminən 10-15 nəfəri birləşdirən və bütün investorların və özəl sektorun maraqlarını təmsil edən İnvestisiya Şurasının və ya Sahibkarlar Şurasının yaradılması təcrübəsi uğurla tətbiq olunur.
"Belə şuralar ildə 1-2 dəfə ölkənin prezidenti və hökumətin iqtisadi bloku ilə mühüm məsələlərlə bağlı fikir mübadiləsi aparmaq və məlumatlandırmaq üçün toplaşırlar. Azərbaycanda yaxın gələcəkdə belə şuranın yaradılması faydalı olardı", - DB nümayəndəliyindəki mənbə deyib.
"Bu təşəbbüsü sahibkarlar irəli sürməlidirlər, eyni zamanda hökumət sahibkarlıqla birgə fəaliyyətdən müəyyən fayda görməlidir ki, ölkədə investisiya mühitini yaxşılaşdırsın", - bankın ekspertləri hesab edirlər.
