Azərbaycan, Bakı, 22 avqust /Trend, müxbir A.Axundov/
Yanvar-iyulda Azərbaycan 54,69 milyon dollar məbləğində un idxal edib ki, bu da ümumi idxalın 1,06 faizini təşkil edir və ötən ilin müvafiq dövründəki göstəricidən 76,6 dəfə çoxdur. Bu barədə Dövlət Gömrük Komitəsindən məlumat verilib.
Yeddi ay ərzində taxıl idxalı 15,29 faiz - 151,196 milyon dollaradək artıb ki, bu da həmin dövr ərzində ölkə idxalının ümumi həcminin 2,94 faizini təşkil edib.
Hesabat dövründə 615,07 milyon dollar məbləğində (il ərzində artım 19,42 faiz) qida məhsulları idxal olunub ki, bu da ölkənin ümumi idxalının 11,96 faizini təşkil edib.
İlin ilk yeddi ayı ərzində yeyinti məhsullarından 84 82 milyon dollar məbləğində şəkər (il ərzində 12,61 faiz azalma, ümumi idxalda payı 1,65 faiz), 72,48 milyon dollar məbləğində yağ (2,67 faiz azalma, ümumi idxalda payı 1,41 faiz), 11,52 milyon dollarlıq ət (8,02 faiz azalma, ümumi idxalda payı 0,22 faiz), 5,43 milyon dollarlıq süd (artım 2,45 faiz, ümumi idxalda payı 0,11 faiz) idxal olunub.
Hesabat dövrü ərzində Azərbaycan idxalının böyük hissəsi - 32,34 faizi maşınların, mexanizmlərin, avadanlıqların, elektrik cihazlarının və onların ehtiyat hissələrinin payına düşüb. Yanvar-iyulda 1,66 milyard dollar məbləğində maşın və avadanlıqlar idxal olunub ki, bu da ötən ilin müvafiq dövr göstəricisini 83,9 faiz ötür.
Həmçinin ölkəyə 773,13 milyon dollar məbləğində nəqliyyat vasitələri və onların hissələri (artım 63,37 faiz, idxalda ümumi payı 15,04 faiz), 658,04 milyon dollar məbləğində qara metallar və ondan hazırlanan məmulatlar (artım 42,42 faiz, idxalda ümumi payı 12,8 faiz), 129,2 milyon dollar məbləğində oduncaq və ondan hazırlanan məmulatlar (artım 52,86 faiz, idxalda ümumi payı 2,51 faiz), 27,8 milyon dollarlıq xalq istehlakı malları (artım 9,77 faiz, idxalda ümumi payı 0,54 faiz), 33,72 milyon dollarlıq mebel və onun hissələri (artım 21,94 faiz və ümumi idxalda payı 0,66 faiz), 112,33 milyon dollarlıq əczaçılıq məhsulları (artım 37,53 faiz və ümumi idxalda payı 2,18 faiz) gətirilib.
Yanvar-iyulda Azərbaycanın idxalı 5,142 milyard dollar təşkil edib ki, bu da 2010-cu ilin analoji dövrü ilə müqayisədə 46,59 faiz çoxdur.
İlin ilk yeddi ayı ərzində ixrac əməliyyatları 15,484 milyard dollar təşkil edib ki, bu da 2010-cu ilin analoji dövrü ilə müqayisədə 28,95 faiz çoxdur.
Ölkədə mal dövriyyəsinin ümumi həcmi 20,626 milyard dollar təşkil edib. Bu, 2010-cu ilin analoji dövrü ilə müqayisədə 32,87 faiz çoxdur.
Xarici ticarət əməliyyatlarında 10,343 milyard dollar həcmində müsbət saldo yaranıb.
