Azərbaycan, Bakı, 16 sentyabr /Trend, müxbir İ.Xəlilova/
2011-ci ilin sonunadək Azərbaycan Beynəlxalq Bankında (ABB) islam bankçılığı xidmətləri və məhsullarının təqdim edilməsi üzrə ixtisaslaşdırılmış struktur təşkil olunacaq. Bu barədə Trend-ə cümə günü bankın İslam bankçılığının tətbiqi qrupunun rəhbəri Bəhnam Qurbanzadə deyib.
"Bu strukturun təşkili üçün məsləhətçi cəlb olunub, o, Salans, KPMG, Pinsent Masons və Dar al-Shariah şirkətlərindən ibarət konsorsiumdur. Sentyabrda müqavilənin imzalanması planlaşdırılır. Məsləhətçi ilə niyyət protokolu imzalanıb, müqavilədə isə onun vəzifələri üzrə yerinə yetirilməli işlər detallaşdırılacaq", - Qurbanzadə bildirib.
Onun sözlərinə görə, məsləhətçinin köməyi ilə 2011-ci ilin sonuna kimi ixtisaslaşdırılmış strukturun fəaliyyətinin başlanması və layihənin islam məhsulları və xidmətlərinin tətbiqi olan birinci mərhələsinin tamamlanması planlaşdırılır.
"Paralel olaraq, Azərbaycan Mərkəzi Bankı ilə qanunvericiliyə uyğun şəkildə islam prinsiplərinə görə bank fəaliyyətinin tənzimlənməsi üzrə təkliflər hazırlanacaq. Bu tədbirlər ikinci mərhələyə aiddir və uzunmüddətli dövr üçün nəzərdə tutulacaq", - o deyib.
ABB islam bankçılığı xidmətlərini 2003-cü ildən təqdim etməyə başlayıb. O, bu sahədə ölkədə ilk bankdır. "Bu sahədəki fəaliyyəti bizim bank İslam İnkişaf Bankı qrupundan cəlb olunmuş mənbələr hesabına göstərirdi, bu gün islam maliyyələşdirməsi çərçivəsində 10 milyon dollara yaxın pul qoyulub", - Qurbanzadə deyib.
Aparılmış tədqiqatlar göstərir ki, ixtisaslaşdırılmış struktur 2012-ci ildən işə başlasa, onda üç il ərzində həmin portfeli 25-30 milyon dollar səviyyəsində saxlamaq olar. Bu hesablamalar cari qanunvericilik nəzərə alınaraq aparılıb: bu bir tərəfdən islam bankçılığını qadağan etmir, digər tərəfdən bu sahədəki fəaliyyəti tənzimləmir.
"Qanunvericiliyə dəyişikliklərin qəbul olunması halında, bu portfelin 200-300 milyon dollaradək artmasını gözləyirik", - o deyib. Həmin hesablamalar Bakıda və respublikanın iri şəhərlərindən biri olanGəncə və ya Sumqayıtda aparılıb.
İlkin olaraq, ABB islam bankçılığını ölkə daxilində tətbiq edəcək, gələcəkdə isə ərəb ölkələrinin maliyyə bazarlarına çıxışı da planlaşdırır.
ABB xarici banklar arasında ilk dəfə olaraq öz nümayəndəliyini Dubay azad iqtisadi zonasında deyil, BƏƏ-nin ümumi bazarında açıb. Hazırda Əmirliklərdə şəxsi nümayəndəliyin bank filialına çevrilməsi üzrə iş aparılır.
Həmçinin, ABB Qətər beynəlxalq maliyyə zonasında özünün törəmə müəssisəsinin açılması üçün hazırlıq işləri görür. Bu müəssisə ABB maliyyə qrupunun üçüncü törəmə müəssisəsi olacaq. Birinci müəssisə - ABB-Moskva 2002-ci ildə fəaliyyətə başlayıb. Hazırda o, Moskva, Sankt-Peterburq və Yekaterinburqdakı 13 ofis və filial ilə maliyyə müəssisəsidir. 2006-cı ilin noyabrında ABB özünün xaricdə ikinci törəmə müəssisəsini - ABB-Gürcüstan-ı təşkil edib.
ABB 1992-ci ildə Xarici İqtisad Bankının Azərbaycan şöbəsinin varisi kimi yaradılıb. ABB ölkənin bank sektorunda hakim mövqe tutur. Bankın nizamnamə kapitalında dövlətin payı 50,2 faiz təşkil edir, payın yerdə qalanı hüquqi və fiziki şəxslər arasında bölüşdürülüb.