Azərbaycan, Bakı, 26 sentyabr /Trend, müxbir A.Axundov/
Azərbaycanda riteylin genişlənməsi üçün mövcud alətlərin inkişafı kifayətdir. Azərbaycan Sığortaçılar Assosiasiyasının icraçı direktoru Azər Əliyev belə hesab edir.
"Əgər biz mövcud istiqamətlər üzrə yaxşı nəticələrə nail ola bilmək üçün səylərimizi cəmləşdirə bilsək, riteylin inkişafı üçün bir neçə il kifayət edəcək", - Əliyev deyib.
Onun sözlərinə görə, əhaliyə sığorta məhsullarının satışının hamı tərəfindən qəbul olunmuş klassik üsulu sığorta məsəhətçilərindən yaxud sığorta agentləri adlandırılan şəxslərdən istifadədir.
Azərbaycanda sığortanın inkişafı ilə əlaqədar agent fəaliyyəti daha sərfəli biznesə çevrilib. Bu gün "AXA MBASK", "Qarant Sığorta", "Beynəlxalq Sığorta Şirkəti" və başqa şirkətlər agent şəbəkəsini aktiv şəkildə genişləndirir.
"Bundan başqa, internetin inkişafı ilə əlaqədar şirkətlərin potensial müştərilərə çıxışı virtual şəbəkədən istifadə etməklə də asanlaşıb", - Əliyev deyib.
Onun sözlərinə görə, Azərbaycanda bütün bunlara hələ yeni başlanılır.
"Bundan əlavə, yeni alətlərin tətbiqi, məsələn, sığortaların satışı üzrə sığorta mağazasının yaradılması mümkündür. Sadəcə olaraq, bununla kimsə məşğul olmalıdır", - Əliyev deyib.
Azərbaycanda 28 sığorta və bir təkrar sığorta şirkəti fəaliyyət göstərir. "Fidan Sığorta" şirkətinin sığorta fəaliyyəti üzrə lisenziyası müvəqqəti dayandırılıb.
