...

Azərbaycan sığortaçısı Əfqanıstanda təyyarənin qəzaya uğraması ilə bağlı avans ödənişlərinə hazırdır

Biznes və iqtisadiyyat xəbərləri Materials 5 Oktyabr 2011 14:20 (UTC +04:00)

Azərbaycan, Bakı, 5 oktyabr /Trend, müxbir A.Axundov/

Azərbaycanın "İpək Yolu Sığorta" sığorta şirkəti gələn həftədən Azərbaycanın "Silk Way" şirkətinin təyyarəsinin Əfqanıstanda qəzaya uğraması zamanı həlak olanların ailələrinə avans ödənişləri həyata keçirməyə hazırdır. Bu barədə Trend-ə çərşənbə axşamı sığorta şirkətinin idarə heyətinin sədri Niyazi Səfərli məlumat verib.

"Əgər şirkətə müraciətlər daxil olarsa və zəruri sənədlər düzgün qaydada təqdim olunarsa, onda biz gələn həftədən avans ödənişlərini həyata keçirə bilərik", - Səfərli deyib.

Onun sözlərinə görə, avans ödənişlərinin məbləği cari həftənin sonunda müəyyən olunacaq.

"Biz tam həcmdə ödənişləri hadisənin baş verməsindən altı ay keçəndən sonra çıxarılmalı olan məhkəmə qərarından sonra həyata keçirə bilərik. Hələ üçüncü aydır", - Səfərli deyib.

İyulun 6-na keçən gecə Əfqanıstanda qəzaya uğramış "Silk Way" aviaşirkətinin İL-76 4K-AZ 55 yük təyyarəsinin 9 ekipaj üzvündən 5-i Azərbaycan, digərləri isə Özbəkistan vətəndaşı olublar.

Bakı-Baqram marşrutu ilə hərəkət edən və saat 21:26-da (yerli vaxtla) havaya qalxan təyyarənin göyərtəsində Heydər Əliyev Beynəlxalq Hava Limanından qəbul etdiyi 18 ton yük olub.
Yük tutumu 40 ton olan təyyarə 2005-ci ildə istehsal edilib və 2011-ci ilin fevralında tam texniki baxışdan keçib. 2011-ci ilin iyununda o, növbəti texniki baxışdan keçib.

Hava gəmisi Azərbaycanın "İpək Yolu Sığorta" şirkəti tərəfindən sığortalanıb.

Hazırda Moskvada MDB Dövlətlərarası Aviasiya Komitəsində qəzanın səbəblərini müəyyən etmək üçün göyərtədəki özüyazan qurğunun təhlili aparılır.

Təyyarənin ekipajı doqquz nəfərdən ibarət olub:
1.Gəminin komandiri Sergey Kuzmin (1969-cu il təvəllüdlü)
2. İkinci pilot Oleq Marşixin (1979-cu il)
3. Şturman İqor Çjen (1966-cı il)
4. Bort mühəndisi Vladimir Şatobin (1969-cu il)
5. Birt radisti Əhmədcan Xacayev (1955-ci il)
6. Bort operatoru Elnur Mahmudov (1981-ci il)
7. Bort operatoru Tapdıq Qəhrəmanov (1964-cü il)
8. Aviatexnik Əfqan Rəhimov (1980-ci il)
9. Aviatexnik Mehman Hüseynov (1962 -ci il)
E. Mahmudov, T.Qəhrəmanov, Ə.Rəhimov, M.Hüseynov və O.Marşixin Azərbaycan vətəndaşları olublar.

Xəbər lenti

Xəbər lenti