Azərbaycan, Bakı, 13 oktyabr /Trend, müxbir A.Axundov/
Azərbaycan Hesablama Palatasına Dünya Bankının büdcə və korporativ sektorlarda hesabatlılıq layihəsi (CAP/SAP) çərçivəsində təkliflər təqdim olunub. Bu barədə Trend-ə cümə axşamı Palatanın sədr müavini Adil Məhərrəmov məlumat verib.
"Məsləhətçi qismində dəvət olunan almaniyalı mütəxəssis Aksel Menniken dünya təcrübəsinin tətbiqi ilə bağlı qanunvericiliyin təkmilləşdirilməsi məqsədilə artıq təklif haızrlayıb və bizə təqdim edib", - Məhərrəmov bildirib.
Onun sözlərinə görə, təklif ingilis dilində təqdim olunub və hazırda Azərbaycan dilinə tərcümə olunur.
"Ayın sonuna kimi biz bu təklifin qiymətləndirilməsini aparacağıq", - o qeyd edib.
Layihənin ümumi dəyəri 24 milyon dollar təşkil edir. Layihə Dünya Bankının (11 milyon dollar), Yaponiya PHRD Fondunun ayırdığı qrantın (üç milyon dollar), SECO-nun (iki milyon dollar) və Azərbaycan hökumətinin payı ilə (8 milyon dollar) maliyyələşdirilir. CAP/SAP layihəsi Dünya Bankın İcraiyyə Şurası tərəfindən 27 mart 2008-ci ildə bəyənilib.
Məhərrəmovun sözlərinə görə, hazırda Hesablama Palatası "Azərenerji" ASC-də auditor yoxlamasını həyata keçirir.
"Bu, cari il həyata keçirilən ilk auditor yoxlamasıdır", - o bildirib.
Onun sözlərinə görə, palata yoxlamanı 15-20 gün ərzində yekunlaşdıracaq.
Məhərrəmovun əvvəllər Trend-ə dediyi kimi, Hesablama Palatası auditor yoxlamalarının sayını artırmağı planlaşdırır.
"Bizim məqsədimiz auditor yoxlamalarının sayını artırmaq, onların əhatəsini genişləndirmək və büdcə vəsaitlərinin xərcləndiyi yerin effektivliyini yoxlamaq üçün budcə vəsaitlərini əhatə etməkdir", - o deyib.
...