Azərbaycan. Bakı, 4 noyabr /Trend, müxbir E.İsmayılov/
2006-2011-ci illərdə Bakı Metropoliteninin stansiyalarının tikintisinə və infrastruktun inkişafına təxminən 600 milyon manata yaxın vəsait ayrılıb. Trend-in məlumatına görə, bu barədə cümə günü Bakı Metropoliteninin rəisi Tağı Əhmədov "Metropoliten işçilərinin peşə bayramı günü"nə həsr olunmuş tədbirdə deyib.
Onun sözlərinə görə, son illər ərzində üç stansiya tikilib və istifadəyə verilib, həmçinin "28 May" stansiyasında ikinci çıxış istismara verilib və metronun "İçərişəhər" stansiyası tamamilə yenidən qurulub.
"Metronun yeni stansiyalarının tikintisi üzrə işlər hazırda da davam edir. Eləcə də "Məşədi Əzizbəyov" stansiyasının yenidən qurulması və modernləşdirilməsi üzrə işlər aparılır. Yenidənqurmadan sonra stansiyanın 5 girişi olacaq. Bu stansiyanın yenidən qurulması üzrə işlərin ilin sonuna qədər başa çatdırılması gözlənilir", - Əhmədov deyib.
Əhmədov növbəti illərdə metropolitenin genişləndirilməsi çərçivəsində işlərin daha intensiv aparılacağını qeyd edib. Xüsusən, Bakı Metropoliteninin 20 illik İnkişaf Proqramı çərçivəsində yeni stansiyaların tikintisi və onların sayının 76-dək çatdırılması planlaşdırılır. Həmçinin, 119 kilometr xətt çəkiləcək.
Əhmədov qeyd edib ki, metro ictimai nəqliyyatın ən çox tələb olunan növlərindən biridir. Bakı Metropoliteni sutkada təxminən 600 min sərnişin daşıyır.
Bakı Metropoliteni 1967-ci ildən fəaliyyət göstərir və onun 23 stansiyası var.