Azərbaycan, Bakı, 10 noyabr /Trend, müxbir A.Axundov/
Bank olmayan kredit təşkilatı "İcraçı Kredit Agentliyi"nin (İKA) baş direktoru Arif Əliyev hesab edir ki, Azərbaycanın aqrar sektorunun inkişafı üçün kredit ittifaqları institutunun möhkəmləndirilməsi lazımdır. Trend-in məlumatına görə, bu barədə cümə axşamı İKA-nın baş direktorunun rəsmi mətbuatda nəşr edilən müsahibəsində deyilir.
"Kredit ittifaqları bir növ kənd banklarıdır, onlar yerli əhali ilə daha çox əlaqədə olurlar. Onların fəaliyyətinin möhkəmləndirilməsi aqrar sektorun inkişafına kömək edir", - Əliyev deyib.
Onun sözlərinə görə, İKA-nın əsas məqsədlərindən biri borclu qruplarla əməkdaşlığın azaldılması və əsasən güclü kredit ittifaqları ilə əməkdaşlığın genişləndirilməsidir.
"Belə ki, kredit ittifaqları hüquqi şəxslərdir ki, buraya 100-200 və daha çox payçı daxildir. Biz çalışırıq ki, kreditləri kredit ittifaqları vasitəsilə ayıraq. Bu, Azərbaycanda kredit ittifaqı institutlarının möhkəmləndirilməsinə zəmanət verəcək və onların yerlərdə etibar qazanmasına imkan verəcək", - Əliyev bildirib.
Onun sözlərinə görə, əgər 2003-cü ildə Azərbaycanda 35-40 kredit ittifaqı qeydiyyata alınıbsa, hazırda onların sayı 80-ni ötüb.
"Hazırda bizimlə işləmək istəyən kredit ittifaqları var, lakin resursların məhdudluğuna görə seçmək məcburiyyətindəyik. İlkin mərhələdə arzuolunandır ki, bu kredit ittifaqları sərbəst, öz vəsaitləri hesabına fəalliyyət göstərsinlər. Məhz bundan sonra biz onlarla əməkdaşlıq edəcəyik", - Əliyev deyib.
İKA rəhbərinin sözlərinə görə, praktika göstərir ki, kənd təsərrüfatı məhsulları istehsalçıları və kiçik fermer təsərrüfatları iri kredit təşkilatları tərəfindən dəstəyə ehtiyac duymurlar.
"Onların mövcud fəaliyyət üçün iri vəsaitlərə ehtiyacları yoxdur. Məsələn, gübrələrin, toxumların alınması, əkin işlərinin həyata keçirilməsi və s. Mindən 5 min manata qədər kreditlər onların ehtiyaclarını ödəyir", - o deyib.
Əliyev bildirib ki, bankların və bank olmayan kredit təşkilatlarının baş ofisləri Bakıda yerləşir, buna görə də fermerlər, kiçik sahibkarlar sənədləri və biznes-planları təqdim etmək üçün əlavə vaxt sərf edərək paytaxta getmək məcburiyyətindədilər.
"Biz isə onlarla kredit ittifaqları vasitəsilə kənd yerlərində əlaqə saxlayırıq. Onların Bakıya gəlmək lüzumu ortadan qalxır. Bizim kreditlər elə də böyük deyil, lakin onlar faydalıdır. Məsələn, kredit ittifaqının bir üzvünə 5 min manata qədər vəsait verilir. Praktika göstərir ki, kənd əhalisinin belə kreditləşməsi digər mənbələrdən asandır və sərfəlidir", - Əliyev deyib.
Noyabrın 10-na olan rəsmi məzənnə 0,7866 AZN/USD təşkil edir.
